ସୁଆଣ୍ଡୋ: ସତ୍ୟବାଦୀ ସାକ୍ଷୀ ଗୋପୀନାଥଙ୍କ ପାଖରେ କାର୍ତ୍ତିକ ମାସରେ ଛତୁଆ ଭୋଗ ଏକ ଅନନ୍ୟ ପରମ୍ପରା। ବହୁଳ ଭାବରେ ଏହି ମାସରେ ଛତୁଆ ଭୋଗ କରାଯାଇଥାଏ । ଶ୍ରୀ ଗୋପାଳ ପଶ୍ଚିମାଞ୍ଚଳର ଠାକୁର ହୋଇଥିବାରୁ ସବୁଦିନ ଗହମ ଜାତ ଦ୍ରବ୍ୟରେ ପ୍ରସ୍ତୁତ ଭଳିକି ଭଳି ଭୋଗ ମହାପ୍ରଭୁଙ୍କ ପାଖରେ ଲାଗି ହୋଇଥାଏ । ସରପୁଳି, ମଗଜଲଡୁ, ମିଠାଖୁରୁମା, ସାଦାଖୁରୁମା, ବଡ଼ ପିଠା, କାକରା, କେଳି, ଖଜା, ଲଡୁ, କୋରା, ବଲ୍ଲଭ, ଖଳିରୋଟି, କ୍ଷୀରି, ଅମାଲୁ ମରିଚିଲଡୁ ଆଦି ଅନେକ ପ୍ରକାରର ଭୋଗ ପ୍ରସ୍ତୁତ ହୋଇ ଠାକୁରଙ୍କୁ ତିନି ଧୂପରେ ପୂଜା କରାଯାଇଥାଏ । କାର୍ତ୍ତିକ ମାସର ଛତୁଆ ଭୋଗ ନେବାକୁ ଶ୍ରଦ୍ଧାଳୁଙ୍କ ଆଗ୍ରହ ପରିଲକ୍ଷିତ ହୋଇଥାଏ । ଘୋରଣାରେ ଗହମ ଓ ଲିଆକୁ ଗୁଣ୍ଡ କରାଯାଇ ଏଥିରେ ନବାତ ଗୁଜୁରାତି କର୍ପୂର ଆଦି ମିଶ୍ରିତ ହୋଇ ବିଭିନ୍ନ କିସମରେ ତିଆରି ହୋଇଥାଏ। ଏହି ଛତୁଆର ସ୍ୱାଦ ଅପୂର୍ବ । ଦିଅଁ ଦର୍ଶନ କରି ଭକ୍ତଟିଏ ଫେରି ଠାକୁରଙ୍କ ପ୍ରସାଦ କିଣିଲା ବେଳେ ଛତୁଆ ନିଶ୍ଚୟ କିଣି ଆଣିଥାଏ । ଏହାର ଦାମ ମଧ୍ୟ ସୁଲଭ । ୫ ଟଙ୍କାରୁ ୨୦ ଟଙ୍କାରେ ଏହା ମିଳିଥାଏ । ସାକ୍ଷୀ ଗୋପୀନାଥଙ୍କ ଛତୁଆ ଭୋଗର ନାଁ ବିଖ୍ୟାତ ହୋଇରହିଛି ।
Comments are closed.