ମୁମ୍ବଇ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପରେ ରାସାୟନିକ ଆକ୍ରମଣ କରିବାକୁ ଧମକ ଦେବା ଅଭିଯୋଗରେ ୨୨ବର୍ଷ ବୟସ୍କ ଜଣେ ଯୁବକକୁ ମୁମ୍ବଇ ପୁଲିସ ଗିରଫ କରିଛି। କାଶୀନାଥ ମଣ୍ଡଳ ନାମକ ଏହି ଯୁବକ ନିରାପତ୍ତା ରକ୍ଷୀ ଭାବେ କାର୍ଯ୍ୟ କରନ୍ତି। ନୂଆଦିଲ୍ଲୀସ୍ଥିତ ଜାତୀୟ ସୁରକ୍ଷା ରକ୍ଷୀ (ଏନ୍ଏସ୍ଜି)ର ନିୟନ୍ତ୍ରଣ କକ୍ଷକୁ ଟେଲିଫୋନ କରି ସେ ପ୍ରଧାନମନ୍ତ୍ରୀଙ୍କୁ ଉପରେ ରାସାୟନିକ ଆକ୍ରମଣ କରିବାକୁ ଧମକ ଦେଇଥିଲେ। ଏନ୍ଏସ୍ଜି ଉକ୍ତ ଟେଲିଫୋନ୍ ନମ୍ବର ଟ୍ରାକ୍ କରି ତାହା ମୁମ୍ବଇର ବୋଲି ଜାଣିବାକୁ ପାଇଥିଲା। ପରେ ମୁମ୍ବଇ ପୁଲିସକୁ ଏ ସମ୍ବନ୍ଧରେ ସୂଚନା ଦିଆଯାଇଥିଲା। ଜୁଲାଇ ୨୭ରେ ମୁମ୍ବଇ ରେଳଷ୍ଟେସନଠାରେ ସୁରତ ଯାଉଥିବା ଟ୍ରେନ୍ରେ ଚଢିବାବେଳେ କାଶୀନାଥଙ୍କୁ କେନ୍ଦ୍ରୀୟ ମୁମ୍ବଇର ଡି. ବି ମାର୍ଗ ଥାନା ପୁଲିସ ଗିରଫ କରିଥିଲା। କାଶୀନାଥ ଝାଡ଼ଖଣ୍ଡର ମୂଳ ବାସିନ୍ଦା ଏବଂ ସେ ମୁମ୍ବଇର ୱାକେଶ୍ୱରସ୍ଥିତ ଏକ ଚାଳିଆରେ ରହୁଥିଲେ। ନିକଟରେ ତାଙ୍କର ଜଣେ ବନ୍ଧୁ ମାଓବାଦୀ ଆକ୍ରମଣରେ ପ୍ରାଣ ହରାଇବା ଘଟଣାକୁ ନେଇ ସେ ପ୍ରଧାନମନ୍ତ୍ରୀଙ୍କୁ ଭେଟିବାକୁ ଚାହୁଁଥିଲେ ବୋଲି ଜେରାବେଳେ କାଶୀନାଥ ପୁଲିସକୁ କହିଛନ୍ତି।
