ନୂଆଦିଲ୍ଲୀ : ବାର୍ଡ-ଫ୍ଲୁ ବା ପକ୍ଷୀ ଜ୍ୱର ବ୍ୟାପିବାକୁ ରୋକିବାପାଇଁ ଜରୁରୀକାଳୀନ ଭିତ୍ତିରେ ପଦକ୍ଷେପ ଗ୍ରହଣ କରିବାକୁ କେନ୍ଦ୍ର ସରକାର ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ସରକାରଙ୍କୁ କହିଛନ୍ତି। ହିମାଚଳ ପ୍ରଦେଶ, ରାଜସ୍ଥାନ, କେରଳ ଓ ଆଉ କିଛି
ରାଜ୍ୟରେ ବହୁ ସଂଖ୍ୟାରେ ପକ୍ଷୀମାନଙ୍କର ମୃତ୍ୟୁ ଘଟିବାରୁ କେନ୍ଦ୍ରରୁ ଏଭଳି ପରାମର୍ଶ ଜାରି କରାଯାଇଛି। କେନ୍ଦ୍ର ସରକାର ଏଥିପାଇଁ ଏକ କଂଟ୍ରୋଲ ରୁମ୍ ପ୍ରତିଷ୍ଠା କରାଯାଇଛି।
ପକ୍ଷୀ ଜ୍ୱର ମାନବ ଶରୀର ଓ ଅନ୍ୟାନ୍ୟ ଜୀବଜନ୍ତୁଙ୍କ ଶରୀରକୁ ପ୍ରବେଶ କରିବାର ସମ୍ଭାବନା ଉପରେ ମଧ୍ୟ ସରକାର ସତର୍କତା ଜାରି କରିଛନ୍ତି। ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକର ମୁଖ୍ୟ ସଚିବମାନଙ୍କ ପାଖକୁ ବିଜ୍ଞପ୍ତି ଜାରି କରି ପରିବେଶ ମନ୍ତ୍ରଣାଳୟ ପକ୍ଷୀମାନଙ୍କ ଶରୀରରେ ରୋଗ ସମ୍ବନ୍ଧୀୟ ଲକ୍ଷଣ ଉପରେ ତୀକ୍ଷ୍ଣ ନଜର ରଖିବାକୁ କହିଛି। ଏହାଛଡ଼ା ମନ୍ତ୍ରଣାଳୟ ICARର ଭୋପାଳସ୍ଥିତ ଜାତୀୟ ପ୍ରାଣୀ ରୋଗ ପ୍ରତିଷ୍ଠାନର ରିପୋର୍ଟକୁ ଉଲ୍ଲେଖ କରି କହିଛି, ମୃତ ପକ୍ଷୀମାନଙ୍କର ନମୁନାରେ H5N1 ଭୂତାଣୁ ଥିବାର ଜଣାପଡ଼ିଛି।
