ନୂଆଦିଲ୍ଲୀ: ଦେଶରେ କରୋନା ସଂକ୍ରମଣ ବୃଦ୍ଧି ପାଉଛି। ଏପରି ସ୍ଥଳେ ଅନେକ ଅଞ୍ଚଳରେ ଲକ୍ଡାଉନ ସତ୍ବେ ପରିବା ଏବଂ ଗ୍ରୋସରି ଦୋକାନ ଖୋଲା ରହୁଛି। ତେଣୁ ସେହି ବ୍ୟବସାୟୀମାନଙ୍କ ସ୍ବାସ୍ଥ୍ୟକୁ ଦୃଷ୍ଟିରେ ରଖି ସେମାନଙ୍କର କରୋନା ପରୀକ୍ଷା କରାଇବାକୁ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ସମସ୍ତ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳକୁ ପରାମର୍ଶ ଦିଆଯାଇଛି। ଗ୍ରୋସରି ଏବଂ ପରିବା ଦୋକାନୀଙ୍କ ସମେତ ଅନ୍ୟ ବ୍ୟବସାୟୀମାନେ କରୋନା ବାହକ ହେବାର ଯଥେଷ୍ଟ ସମ୍ଭାବନା ରହିଛି। ସେମାନଙ୍କଠାରୁ ଅନ୍ୟ ଗ୍ରାହକଙ୍କୁ କରୋନା ବ୍ୟାପିପାରେ। ତେଣୁ ସେମାନଙ୍କର କରୋନା ପରୀକ୍ଷା କରାଗଲେ ସଂକ୍ରମଣ ଉପରେ ରୋକ ଲଗାଯାଇପାରିବା ସହିତ ମୃତ୍ୟୁ ହାରକୁ କମ୍ କରାଯାଇ ପାରିବ ବୋଲି କୁହାଯାଇଛି।
ସ୍ବାସ୍ଥ୍ୟ ବିଭାଗ ସଚିବ ରାଜେଶ ଭୂଷଣ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳର ମୁଖ୍ୟ ସଚିବମାନଙ୍କୁ ଚିଠି ଲେଖି ଏହି ପରାମର୍ଶ ଦେଇଛନ୍ତି। ଏହା ସହିତ ସେ ଆହୁରି କହିଛନ୍ତି ଯେ, ଆମ୍ବୁଲାନ୍ସଗୁଡ଼ିକରେ ଅମ୍ଳଜାନ ବ୍ୟବସ୍ଥା କରାଯାଉ, ଯାହା ଫଳରେ ଗୁରୁତର କରୋନା ରୋଗୀମାନଙ୍କ ପାଇଁ ଅମ୍ଳଜାନ ଅଭାବ ହେବ ନାହିଁ। ଯେଉଁ ସ୍ଥାନରେ ଆମ୍ବୁଲାନ୍ସ ଉପଲବ୍ଧ ହେଉନାହିଁ ତାହା ଉପରେ ନଜର ରଖି ସେଠାରେ ଆମ୍ବୁଲାନ୍ସ ବ୍ୟବସ୍ଥା କରିବାକୁ କୁହାଯାଇଛି। ସେହିପରି କରୋନା ଯୋଗୁ ହେଉଥିବା ମୃତ୍ୟୁର ଅଡିଟ୍ ପ୍ରତି ସପ୍ତାହରେ କରାଯାଉ ବୋଲି ଚିଠିରେ ପରାମର୍ଶ ଦିଆଯାଇଛି।
