ବୌଦ୍ଧ : ବୌଦ୍ଧବ୍ଲକ ଅନ୍ତର୍ଗତ ବଘିଆପଡା ପଞ୍ଚାୟତରେ ପାଲଝାର ଚେକଡ୍ୟାମରେ ସେଲଫି ନେଉଥିବାବେଳେ ଜଣେ ଯୁବ ଇଂଜିନିୟରଙ୍କ ମୃତ୍ୟୁ ହୋଇଯାଇଥିବା ଜଣାଯାଇଛି। ସୂଚନା ମୁତାବକ ସାଲୁଙ୍ଖୀ ନଦୀ ଉପରେ ନିର୍ମିତ ଏହି ଚେକଡ୍ୟାମକୁ ରବିବାର ମଧ୍ୟାହ୍ନରେ ବୌଦ୍ଧରେ ମେଗା ଉଠାଜଳସେଚନ ପକଳ୍ପ ନିର୍ମାଣ କାର୍ଯ୍ୟ କରୁଥିବା କିଛି ଅଣଓଡ଼ିଆ ଲୋକ ଦୁଇଗୋଟି ଗାଡିରେ ବୁଲିବାକୁ ଆସିଥିଲେ। ସେମାନଙ୍କ ମଧ୍ୟରୁ ତିନିଜଣ ଇଂନିଜିନିୟର ପାଲଝାର ଡ୍ୟାମ ନିକଟରେ ସେଲଫି ନେଉଥିବାବେଳେ ଖରସ୍ରୋତା ନଦୀ ଜଳରେ ଜଣଙ୍କର ମୋବାଇଲଟି ପଡିଯାଇଥିଲା। ଫଳରେ ମୋବାଇଲ ଖୋଜିବାକୁ ତିନିଜଣ ଡ୍ୟାମ ତଳକୁ ଓହ୍ଲାଇଥିବା ବେଳେ ପାଣିର ଖରସ୍ରୋତ ଯୋଗୁଁ ଦୁଇଜଣଙ୍କ ଗୋଡ ଖସିଯିବାରୁ ଭାସି ଯାଇଥିଲେ।
ସେଠାରେ ମାଛ ମାରୁଥିବା କିଛି ଲୋକ ଜଣକୁ ଉଦ୍ଧାର କରିବାରେ ସଫଳ ହୋଇଥିବାବେଳେ ଅନ୍ୟଜଣେ ଯୁବ ଇଂନିଜିନିୟର ନଦୀ ଜଳରେ ନିଖୋଜ ହୋଇଯାଇଥିଲେ। ଅନେକ ଖୋଜାଖୋଜି ପରେ ନପାଇବାରୁ ଶେଷରେ ଏନେଇ ବୌଦ୍ଧ ଅଗ୍ନିଶମ ବିଭାଗ ଓ ବଘିଆଫାଣ୍ଡିରେ ସୂଚନା ଦିଆଯାଇଥିଲା। ତେବେ ରାତ୍ରିରେ ଉଦ୍ଧାର କାର୍ଯ୍ୟ ସମ୍ଭବ ନଥିବାରୁ ସକାଳୁ ଅଗ୍ନିଶମ ବିଭାଗର ଓଡ୍ରାଫ ଟିମ ଓ ବଘିଆପଡା ପୁଲିସ ଘଟଣାସ୍ଥଳରେ ପହଞ୍ଚି ନିଖୋଜ ଇଂଜିନିୟରଙ୍କୁ ଖୋଜିବା ଆରମ୍ଭ କରିଥିଲେ। ଦୀର୍ଘ ସମୟ ପ୍ରଚେଷ୍ଟା ପରେ ଓଡ୍ରାଫ ଟିମ ତାଙ୍କର ମୃତ ଦେହ ଉଦ୍ଧାର କରିବାରେ ସଫଳ ହୋଇଥିଲେ। ମୃତ ଇଂଜିନିୟରଙ୍କ ନାମ ମୁକୁନ୍ଦମ ଆର (୨୨ ବର୍ଷ) ହୋଇଥିବାବେଳେ ତାଙ୍କ ଘର ତାମିଲନାଡୁ ବୋଲି ଜଣାପଡିଛି। ପୁଲିସ ଶବକୁ ଜବତ କରି ବ୍ୟବଛେଦ ପାଇଁ ପଠାଇବା ସହିତ ଘଟଣା ସଂପର୍କରେ ତଦନ୍ତ ଆରମ୍ଭ କରିଛି।
