ବଲାଙ୍ଗିର: ବଲାଙ୍ଗିର ରେଳ ଉପଭୋକ୍ତା ସଂଘର ନୂତନ କର୍ମକର୍ତା ଚୟନ ପରେ ଆଜି ପ୍ରଥମ କାର୍ଯ୍ୟକାରିଣୀ ବୈଠକ ସଂଘର ସଭାପତି ତରୁଣ କୁମାର ମିଶ୍ରଙ୍କ ସଭାପତିତ୍ୱରେ ସ୍ଥାନୀୟ ମାଲପଡ଼ାରେ ଅନୁଷ୍ଠିତ ହୋଇଥିଲା। ସଂଘର ସାଧାରଣ ସଂପାଦକ ନାରାୟଣ ପାଢ଼ୀ ପୂର୍ବ ବୈଠକର ବିବରଣୀ ପାଠ କରିଥିଲେ।
ବଲାଙ୍ଗିର ରେଳ ଷ୍ଟେସନରେ ୨ୟ ଲାଇନ୍ ହେବା ପରେ ପ୍ଲାଟଫର୍ମ ୨ ଓ ୩ରୁ ବରିଷ୍ଠ ଓ ବିକଳାଙ୍ଗ ଯାତ୍ରୀମାନଙ୍କୁ ଓଭର୍ ବ୍ରିଜରେ ଚଢି ଆସିବାକୁ ଅସୁବିଧା ହେଉଛି। ତେଣୁ ଏକ ଲିଫ୍ଟର ବ୍ୟବସ୍ଥା କରିବା, ଯାତ୍ରୀମାନଙ୍କ ସୁବିଧା ପାଇଁ ଟ୍ରେନ ସମୟସାରଣୀ ଡିସ୍ପ୍ଲେ ବୋଡ ସମସ୍ତ ପ୍ଲାଟଫର୍ମରେ ଲଗାଇବା, ଟିକେଟ କାଉଣ୍ଟରରୁ ଷ୍ଟେସନ ପର୍ଯ୍ୟନ୍ତ ଏକ ସେଡ ତିଆରି କରିବା, ମଧ୍ୟ ରାତ୍ର ସମୟରେ ଆସୁଥିବା ଟ୍ରେନ ସମୟରେ ରେଳ ଷ୍ଟେସନ ରାସ୍ତାରେ ରାତ୍ରିକାଳୀନ ପୁଲିସ ପେଟ୍ରୋଲିଂ ପାଇଁ ଟାଉନ ପୁଲିସ ଏବଂ ଜିଆରପି ସହ ସଂଘର ଏକ ପ୍ରତିନିଧି ଦଳ ଆଲୋଚନା କରିବାକୁ ପ୍ରସ୍ତାବ ହୋଇଥିଲା। ବଲାଙ୍ଗିର ନହେଲେ ବଲାଙ୍ଗିର ଦେଇ ଦିଲ୍ଲୀ, ପ୍ରୟାଗରାଜ ଟ୍ରେନ ଚଳାଇବାକୁ ଦାବି କରିବାକୁ ନିଷ୍ପତି ହୋଇଥିଲା। ପୁରୀ -ସମ୍ବଲପୁର ଇଣ୍ଟରସିଟି ଟ୍ରେନକୁ ଟିଟିଲାଗଡ଼ ପର୍ଯ୍ୟନ୍ତ ସଂପ୍ରସାରଣ କରିବାକୁ ଦାବି କରାଯିବାକୁ ସଦସ୍ୟମାନେ ପ୍ରସ୍ତାବ ରଖିଥିଲେ। ସେହିପରି ବଲାଙ୍ଗିର, ସୋନପୁର, ବରଗଡ଼, ଭବାନୀପାଟଣା ଓ ସମ୍ବଲପୁରକୁ ନେଇ ଏକ ରେଳ ଉପଭୋକ୍ତା ସମନ୍ୱୟ କମିଟି ଗଠନ କରିବା ସହ ଏହି ଜିଲାର ସମସ୍ତ ସାଂସଦମାନଙ୍କ ସହ ଆଲୋଚନା କରି ବିଭିନ୍ନ ଦାବି ନେଇ ଏକ ମିଳିତ ଦାବିପତ୍ର ପ୍ରଧାନମନ୍ତ୍ରୀ ଓ ରେଳମନ୍ତ୍ରୀଙ୍କୁ ପ୍ରଦାନ କରିବାକୁ ସଦସ୍ୟମାନେ ପ୍ରସ୍ତାବ ଦେଇଥିଲେ। ଆଜିର ବୈଠକରେ କୋଷାଧ୍ୟକ୍ଷ ଅଶୋକ କୁମାର ଚାନ୍ଦ, ଅଶୋକ କୁମାର ମିଶ୍ର, ଛବିଲାଲ ବେହେରା, ମନୋରଜଂନ ପୁରୋହିତ, ଯୁଧୀଷ୍ଟିର ମିଶ୍ର, ଦିବାକର ହୋତା ଓ ରୁତୁରାଜ ସିଂହ ପ୍ରମୁଖ ଉପସ୍ଥିତ ଥିଲେ।
