ଭୁବନେଶ୍ୱର : ବିଜୁ ଜନତା ଦଳ ପକ୍ଷରୁ ରାଜ୍ୟବ୍ୟାପୀ ଗାନ୍ଧୀଜୟନ୍ତୀରୁ ଆରମ୍ଭ ହୋଇଥିବା ଜନସମ୍ପର୍କ ପଦଯାତ୍ରାର ଅବଧିକୁ ଦଳର ରାଜ୍ୟ ସଭାପତି ନବୀନ ପଟ୍ଟନାୟକ ୩୧ ତାରିଖ ପର୍ଯ୍ୟନ୍ତ ବୃଦ୍ଧି କରିଛନ୍ତି। ଏହି ପଦଯାତ୍ରା ପ୍ରତି ଜନସାଧାରଣଙ୍କ ଆଗ୍ରହକୁ ଗୁରୁତ୍ବ ଦେବା ସହ ପଦଯାତ୍ରାର ଉଦେଶ୍ୟ ଅଧିକ ଲୋକଙ୍କ ନିକଟରେ ପହଞ୍ଚାଇବା ଲକ୍ଷ୍ୟ ରଖି ଶ୍ରୀ ପଟ୍ଟନାୟକ ଏହାର ଅବଧି ବୃଦ୍ଧି କରିଥିବା ଦଳ ପକ୍ଷରୁ ସୂଚନା ଦିଆଯାଇଛି। ଏହି ପଦଯାତ୍ରା ଗାନ୍ଧୀଜୟନ୍ତୀରୁ ୧୧ ତାରିଖ ପର୍ଯ୍ୟନ୍ତ କରାଯିବାକୁ ସ୍ଥିର ହୋଇଥିଲା। ମଝିରେ ପୂଜା ପଡୁଥିବାରୁ ପଦଯାତ୍ରାର ସମୟ ବଢ଼ାଇବାକୁ ଦଳର ଜିଲା ସଭାପତି, ଜିଲା ପର୍ଯ୍ୟବେକ୍ଷକ ଓ ଦଳର କାର୍ଯ୍ୟକର୍ତ୍ତାମାନେ ୧ ତାରିଖରେ ଅନୁଷ୍ଠିତ ବୈଠକରେ ରାଜ୍ୟ ସଭାପତି ଶ୍ରୀ ପଟ୍ଟନାୟକଙ୍କୁ ପ୍ରସ୍ତାବ ଦେଇଥିଲେ। ପଦଯାତ୍ରା ସମୟରେ ଦଳର ନେତା ଓ କର୍ମୀମାନେ ବିଜେଡି ସରକାର ସମୟରେ ରାଜ୍ୟର ବିକାଶ ସହ ‘ମୋ ସରକାର’ ଓ ୫-ଟିର ଉପକାରିତା ସମ୍ପର୍କରେ ଜନସାଧାରଣଙ୍କୁ ଅବଗତ କରୁଛନ୍ତି।
