ଭଦ୍ରକ: ଜଣେ ପୁଲିସ ଅଧିକାରୀ କାର୍ଯ୍ୟରତ ଥିବା ସମୟରେ ତାଙ୍କ ଉପରେ ମାଡ଼ିଗଲା ଟ୍ରକ। ଫଳରେ ପୁଲିସ ଅଧିକାରୀଙ୍କ ଶୋଚନୀୟ ମୃତ୍ୟୁ ଘଟିଛି। ଏଭଳି ଅଭାବନୀୟ ଘଟଣା ଘଟିଛି ଭଦ୍ରକ ୧୬ନଂ ଜାତୀୟ ରାଜପଥର ଚିଙ୍ଗୁଡିପୁର ଛକରେ। ଚିଙ୍ଗୁଡିପୁର ଛକ ନିକଟରୁ ରାସ୍ତା ଜାମ୍ ହଟାଉଥିବା ସମୟରେ ଜିଲା ପୁଲିସରେ କାର୍ଯ୍ୟରତ ଏସପିଓ ସୁଜିତ ପାଣ୍ଡବଙ୍କ ଉପରେ ଏକ ଟ୍ରକ ଚଢିଯାଇଥିଲା। ଗୁରୁତର ଅବସ୍ଥାରେ ତାଙ୍କୁ କଟକ ନେଉଥିବା ସମୟରେ ବାଟରେ ତାଙ୍କର ମୃତ୍ୟୁ ଘଟିଛି।
ସୂଚନା ଅନୁସାରେ, ଶୁକ୍ରବାର ଭୋରରୁ ଭଦ୍ରକ ଗ୍ରାମାଞ୍ଚଳ ଥାନା ଅନ୍ତର୍ଗତ ୧୬ନଂ ଜାତୀୟ ରାଜପଥ ଚିଙ୍ଗୁଡିପୁର ଛକ ନିକଟରେ ହଠାତ ରାସ୍ତା ଜାମ୍ ହୋଇଯାଇଥିଲା। ଏହି ସମୟରେ ଏନଏଚ ପାଟ୍ରୋଲିଂ ଦାୟିତ୍ୱରେ ଥିବା ଏସପିଓ ସୁଜିତ ପାଣ୍ଡବ ରାସ୍ତାରେ ଠିଆ ହୋଇ ଗାଡିଗୁଡିକୁ ପାସ୍ କରାଉଥିଲେ। ଏହି ସମୟରେ ସେଠାରେ ଥିବା ଡାଇଭର୍ସନ ନିକଟରେ ଏକ ଟ୍ରକ ପୁଲିସ ଅଧିକାରୀଙ୍କ ଉପରେ ଚଢି ଯାଇଥିଲା। ତାଙ୍କୁ ଗୁରୁତର ଅବସ୍ଥାରେ ପ୍ରଥମେ ଯାଜପୁର ଓ ପରେ କଟକ ବଡ ଡାକ୍ତରଖାନା ନେବା ବାଟରେ ତାଙ୍କର ମୃତ୍ୟୁ ହୋଇଥିଲା। ତାଙ୍କର ପରିବାର ଲୋକଙ୍କୁ ଖବର ଦିଆଯାଇଛି। ଏହି ଦୁର୍ଘଟଣା ଘଟାଇଥିବା ଟ୍ରକ ଓ ଚାଳକକୁ ଧାମନଗର ପୁଲିସ ଅଟକ ରଖି ଘଟଣାର ତଦନ୍ତ କରୁଛି। ସୁଜିତ ପାଣ୍ଡବ ପୂର୍ବରୁ ସେନା ନିଵୃତ ଥିଲେ।
