ବାରିପଦା – ଶିମିଳିପାଳରେ ପୁଣି ହାତୀ ଶିକାର କରି ଦାନ୍ତ କାଟି ନେଇଛନ୍ତି ଦୁର୍ବୃତ୍ତ। ପିଠାବଟା ରେଞ୍ଜ ଗୋପିନାଥପୁର ବିଟ୍ ଅଞ୍ଚଳରେ ଘଟିଛି ଘଟଣା। ଶିମିଳିପାଳ କର୍ତ୍ତୃପକ୍ଷଙ୍କ ଦ୍ୱାରା ତଦନ୍ତ ଜାରି ରହିଛି। ତିନି ଚାରି ଦିନ ପୂର୍ବରୁ ହାତୀକୁ ଶିକାର କରି ଦାନ୍ତ କାଟିନେଇଥିବା କହିଛନ୍ତି ଶିମିଳିପାଳ ଉପନିର୍ଦେଶକ। ହାତୀର ବୟସ ୭ ରୁ ୮ ବର୍ଷ ମଧ୍ୟରେ ହୋଇଥିବା ସୂଚନା ମିଳିଛି। ହାତୀଟିକୁ ହତ୍ୟା କରିବା ପରେ ଶିକାରୀ ଶୁଣ୍ଢ କାଟି ଦାନ୍ତ ଉପାଡ଼ି ନେଇଛନ୍ତି। ଶିମିଳିପାଳରେ ଅରୁଣାଚଳ ପ୍ରଦେଶର ଏକ ରାକେଟ୍୍ ସକ୍ରିୟ ଥିବା ଶିମିଳିପାଳ କର୍ତ୍ତୃପକ୍ଷ ସୂଚନା ପାଇଥିବା ବେଳେ ଶୀଘ୍ର ଏହି ଦଳକୁ ଧରିବାକୁ ସକ୍ଷମ ହେବୁ ବୋଲି ଶିମିଳିପାଳ ଉତ୍ତର ଉପନିର୍ଦେଶକ ସମ୍ରାଟ ଗୌଡ଼ା କହିଛନ୍ତି। ସୂଚନା ଅନୁଯାୟୀ ଉକ୍ତ ଅଞ୍ଚଳରେ ପେଟ୍ରୋଲିଂ ସମୟରେ ବନ କର୍ମଚାରୀ ବୁଧବାର ଅପରାହ୍ନରେ ହାତୀ ମୃତଦେହ ଦେଖି ଉପରିସ୍ଥ ଅଧିକାରୀଙ୍କୁ ଜଣାଇଥିଲେ। ରାତି ହୋଇଯାଇଥିବାରୁ ଗୁରୁବାର ପ୍ରତ୍ୟୁଷରେ ପ୍ରାଣୀ ଚିକିତ୍ସକଙ୍କୁ ସାଙ୍ଗରେ ନେଇ ଘଟଣାସ୍ଥଳକୁ ବନ ବିଭାଗ ଦଳ ଯାଇଛନ୍ତି। ଏ ସମ୍ପର୍କରେ ଅଧିକ ତଦନ୍ତ ଜାରି ରହିଛି।
Comments are closed.