ବଣାଇ: ବଣାଇରେ ଶତକଡ଼ା ୭୦ ଭାଗ ଲୋକ ଚାଷ ଉପରେ ନିର୍ଭର କରି ନିଜ ଜୀବନ ଜୀବିକା ନିର୍ବାହ କରୁଥିବାବେଳେ ୟୁରିଆ ସାର ବସ୍ତାଟିଏ ପାଇଁ ଡହଳ ବିକଳ ହେଉଥିବା ଦେଖିବାକୁ ମିଳିଛି। ବଣାଇଗଡ଼ ଭଳି ଲ୍ୟାମ୍ପକୁ ଗତକାଲି ୧୦୬୦ ବସ୍ତା ୟୁରିଆ ସାର ଋଣୀ ଚାଷୀଙ୍କ ପାଇଁ ଆସିଥିବା ବେଳେ ଖବର ପାଇ ୪ହଜାରରୁ ଊର୍ଦ୍ଧ୍ବ ଚାଷୀ ଆଜି ସକାଳ ୭ଟାରୁ ଆସି ଭିଡ଼ ଜମାଇଥିଲେ। ଲ୍ୟାମ୍ପସ କାର୍ୟ୍ୟାଳୟର ମୁଖ୍ୟ ଫାଟକର ଉଭୟ ପାର୍ଶ୍ବରେ ହଜାର ହଜାର ମହିଳା ପୁରୁଷ ଚାଷୀ ଦୀର୍ଘ ସମୟ ଧରି ଲମ୍ବା ଲାଇନରେ ଛିଡ଼ା ହୋଇଥିଲେ। ୧୦୬୦ ବସ୍ତା ସାର ଆସିଥିବା ଖବରପାଇ ଡହଳ ବିକଳ ହେଉଥିବା ଚାଷୀମାନେ ପୁଲିସ ଉପସ୍ଥିତିରେ ମୁଖ୍ୟ ଲୁହା ଫାଟକକୁ ଭାଙ୍ଗି ଦେଇଥିଲେ। ଫଳରେ ଘଟଣାସ୍ଥଳରେ ବହୁ ସମୟ ଧରି ଉତ୍ତେଜନା ପ୍ରକାଶ ପାଇଥିଲା। ପରେ ସ୍ଥାନୀୟ ପ୍ରଶାସନ, ଲ୍ୟାମ୍ପସ କର୍ତ୍ତୃପକ୍ଷ ଓ ପୁଲିସ ଚାଷୀମାନଙ୍କୁ ବୁଝାସୁଝା କରିବା ସହିତ ଆଜି ପାଇଁ ସାର ବଣ୍ଟନ କାର୍ୟ୍ୟକୁ ସ୍ଥଗିତ ରଖାଯାଇଥିଲା। ପରେ ବଣାଇଗଡ଼ ଲ୍ୟାମ୍ପସ ଅଧୀନରେ ଜକୈକଳା, ଗୋବିନ୍ଦପୁର, କେନାଭେଟା, କେନ୍ଦ୍ରିକଳା, ବଡଗୋଗୁଆ ଓ ବଣାଇଗଡ଼ ପଞ୍ଚାୟତରେ ଥିବା ୭୦୦ଜଣ ଋଣୀ ଚାଷୀଙ୍କ ନିକଟରୁ ସାର ପାଇଁ ଆଗୁଆ ଚେକ ସଂଗ୍ରହ କରାଯାଇଥିଲା। ଆସନ୍ତାକାଲି ଜକୈକଳା ପଞ୍ଚାୟତର ୧୩୫ ଓ ଗୋବିନ୍ଦପୁର ପଞ୍ଚାୟତର ୧୫୬ ଜଣଙ୍କୁ ସାର ପ୍ରଦାନ କରାଯିବା ସହିତ ପର୍ୟ୍ୟାୟକ୍ରମେ ଅନ୍ୟ ପଞ୍ଚାୟତ ଗୁଡ଼ିକର ଋଣୀ ଚାଷୀମାନଙ୍କ ସାର ଦେବା ପରେ ଅନ୍ୟ ଚାଷୀମାନଙ୍କୁ ସାର ପ୍ରଦାନ କରାଯିବ ବୋଲି ଲ୍ୟାମ୍ପସ ପରିଚାଳନା ନିର୍ଦ୍ଦେଶକ ହରେନ୍ଦ୍ର ବାରିକ ପ୍ରକାଶ କରିଛନ୍ତି।
Popular Categories
Previous article
Next article