ମୁମ୍ବଇ: ନିଜ କଥା ରଖିଲେ ବାଦଶାହ। ‘ବଡ଼ୋ ଲୋକେର୍ ବେଟି ଲୋ…’ ଗୀତର ଅସଲି ଲେଖକ ରତନ କହରଙ୍କୁ ୫ ଲକ୍ଷ ଟଙ୍କା ପ୍ରଦାନ କରି ନିଜ ମାନବିକତାର ପରିଚୟ ଦେଇଛନ୍ତି ବଲିଉଡ଼ର ଏହି ଲୋକପ୍ରିୟ ରାପର୍। ସୋମବାର ସେ ଗୀତର ଅସଲି ଲେଖକ ରତନ କହରଙ୍କ ବ୍ୟାଙ୍କ୍ ଆକାଉଣ୍ଟରେ ଏହି ଟଙ୍କା ଜମା କରିଛନ୍ତି।
ସୂଚନାଯୋଗ୍ୟ, ବାଦଶାହଙ୍କ ଗୀତ ‘ଗେନ୍ଦା ଫୁଲ୍’ ଅଦମ୍ୟ ସଫଳତା ହାସଲ କରିଥିବା ବେଳେ ଅନ୍ୟ ପକ୍ଷରେ ଏହି ଗୀତକୁ ନେଇ ବାଦଶାହଙ୍କ ଉପରେ ଲେଖା ଚୋରି ଅଭିଯୋଗ ହୋଇଥିଲା। ଗୀତରେ ଥିବା ବଙ୍ଗଳା ପଦ ‘ବଡ଼ୋ ଲୋକେର୍ ବେଟି ଲୋ…’ର ଅସଲି ଲେଖକ ରତନ କହରଙ୍କ ଲେଖା ଚୋରି ସହ ଗୀତରେ ତାଙ୍କୁ ଶ୍ରେୟ ଦିଆଯାଇ ନ ଥିବା ନେଇ ବିବାଦ ଦେଖା ଦେଇଥିଲା। ଅନ୍ୟପକ୍ଷରେ ଏହାର ଅସଲି ଲେଖକଙ୍କ ବିଷୟରେ କିଛି ଜାଣି ନ ଥିବା ବାଦଶାହ କହିଥିଲେ ଓ ଏନେଇ ମାନବିକତା ଦୃଷ୍ଟିକୋଣରୁ ଯାହା କରିବା କଥା ସେ ନିଶ୍ଚୟ କରିବେ ବୋଲି କହିଥିଲେ। ଗୀତର ଅସଲି ଲେଖକ ରତନ କହର ଏବେ ଦାରିଦ୍ର୍ୟତାରେ ଜୀବନ ଅତିବାହିତ କରୁଥିବା ଜାଣିବା ପରେ ତାଙ୍କୁ ଯଥା ସମ୍ଭବ ସାହାଯ୍ୟ କରିବେ ବୋଲି ବାଦଶାହ ଗଣମାଧ୍ୟମରେ କହିଥିଲେ। ତେବେ ଶୁକ୍ରବାର ବାଦଶାହ ଭିଡିଓ କଲ୍ ମାଧ୍ୟମରେ ରତନ ମେହେରଙ୍କ ସହ କଥା ହୋଇଥିଲେ ଏବଂ ତାଙ୍କ ଆକାଉଣ୍ଟ ସମ୍ବନ୍ଧୀୟ ତଥ୍ୟ ଆଣି ସୋମବାର ତାଙ୍କ ଆକାଉଣ୍ଟରେ ୫ ଲକ୍ଷ ଟଙ୍କା ଜମା କରିଛନ୍ତି।
ଅପର ପାର୍ଶ୍ବରେ ବାଦଶାହଙ୍କଠାରୁ ଆର୍ଥିକ ସାହାଯ୍ୟ ପାଇବା ପରେ ଲେଖକ ରତନ କହର ଫୋନ୍ ମାଧ୍ୟମରେ ତାଙ୍କୁ କୃତଜ୍ଞତା ଜ୍ଞାପନ କରିବା ସହ ବାଦଶାହଙ୍କୁ ଭେଟିବାକୁ ଚାହୁଁଥିବାରୁ ପଶ୍ଚିମବଙ୍ଗର ବୀରଭୂମ ଜିଲା ସ୍ଥିତ ତାଙ୍କ ଘରକୁ ଆସିବାକୁ ନିବେଦନ କରିଛନ୍ତି।
