ଲାହୋର: କ୍ରିକେଟ୍ର ଟ୍ବେଣ୍ଟି୨୦ ଫର୍ମାଟ୍ରେ ଦ୍ରୁତତମ ୧୦,୦୦୦ ରନ୍ ସ୍କୋର୍ କରିବାର କୃତିତ୍ବ ହାସଲ କରିଛନ୍ତି ପାକିସ୍ତାନର ତାରକା ବ୍ୟାଟ୍ସମ୍ୟାନ୍ ବାବର ଆଜମ୍। ଏହି କ୍ରମରେ ଟ୍ବେଣ୍ଟି୨୦ କ୍ରିକେଟ୍ରେ ୟୁନିଭର୍ସାଲ ବସ୍ ଭାବେ ପରିଚିତ ୱେଷ୍ଟଇଣ୍ଡିଜ୍ର କ୍ରିସ୍ ଗେଲ୍ଙ୍କୁ ପଛରେ ପକାଇ ଦେଇଛନ୍ତି ବାବର। ମାତ୍ର ୨୭୧ ରନ୍ରେ ବାବର ଆଜମ୍ ୧୦,୦୦୦ ଟ୍ବେଣ୍ଟି୨୦ ରନ୍ ପୂରଣ କରିଛନ୍ତି। କ୍ରିିସ୍ ଗେଲ୍ ୨୮୫ ଇନିଂସରେ ୧୦,୦୦୦ ଟ୍ବେଣ୍ଟି୨୦ ରନ୍ ପୂରଣ କରିଥିଲେ। ଭାରତର ବିରାଟ କୋହଲି ୨୯୯ ଇନିଂସରେ ଏହି କୃତିତ୍ବ ହାସଲକରି ୩ୟ ସ୍ଥାନରେ ରହିଛନ୍ତି। ଚଳିତ ପାକିସ୍ତାନ ସୁପର ଲିଗ୍ (ପିଏସ୍ଏଲ୍)ରେ ବୁଧବାର ପେଶାୱର ଜାଲ୍ମି ପାଇଁ କରାଚି କିଙ୍ଗ୍ସ ବିପକ୍ଷ ମ୍ୟାଚ୍ରେ ବାବର ଆଜମ୍ ୧୦,୦୦୦ ଟ୍ବେଣ୍ଟି୨୦ ରନ୍ ପୂରଣ କରିଛନ୍ତି। ଏହି ମାଇଲ୍ଖୁଣ୍ଟ ପାର କରିବାକୁ ବାବର ମାତ୍ର ୬ ରନ୍ ଆବଶ୍ୟକ କରୁଥିଲେ। ଏହି ଇନିଂସରେ ଅଧିନାୟକ ବାବର ୫୧ ବଲ୍ରୁ ଗୋଟିଏ ଛକା ଓ ୭ଟି ଚୌକା ସହ ୭୨ ରନ୍ କରିଥିଲେ। ତଥାପି କରାଚି କିଙ୍ଗ୍ସ ବିପକ୍ଷରେ ବାବର ତାଙ୍କ ଦଳକୁ ଜିତାଇ ପାରିନଥିଲେ। ଟ୍ବେଣ୍ଟି୨୦ କ୍ରିକେଟ୍ରେ ୧୩ଶ ବ୍ୟାଟ୍ସମ୍ୟାନ ଭାବେ ବାବର ଆଜମ୍ ୧୦,୦୦୦ ରନ୍ ପୂରଣ କରିଛନ୍ତି। ତେବେ ଟ୍ବେଣ୍ଟି୨୦ କ୍ରିକେଟ୍ରେ ସର୍ବାଧିକ ରନ୍ ସ୍କୋର୍ କରିବାର କୀର୍ତ୍ତିମାନ କ୍ରିସ୍ ଗେଲ୍ଙ୍କ ନାମରେ ରହିଛି। ବାମହାତି ଗେଲ୍ ଟ୍ବେଣ୍ଟି୨୦ କ୍ରିକେଟ୍ରେ ୧୪,୫୬୨ ରନ୍ ସ୍କୋର୍ କରିଛନ୍ତି।
Popular Categories
Previous article
Next article