ଲକ୍ଷ୍ନୌ : ୟୁପିର ଚିତ୍ରକୂଟରେ ବଡ ଦୁର୍ଘଟଣା ଘଟିଛି । ମଙ୍ଗଳବାର ଅମାତପୁର ଗାଁ ନିକଟରେ ଭକ୍ତଙ୍କୁ ନେଇ ଆସୁଥିବା ଏକ ଅଟୋରିକ୍ସାକୁ ଏକ ଡମ୍ଫର ଧକ୍କା ଦେଇଛି । ଏହି ଦୁର୍ଘଟଣାରେ ଜଣେ ନାବାଳିକା ସମେତ ୫ ଜଣଙ୍କ ମୃତ୍ୟୁ ହୋଇଛି । ତେବେ ୩ ଆହତଙ୍କୁ ଜିଲା ହସ୍ପିଟାଲରେ ଭର୍ତ୍ତି କରାଯାଇଛି । ଡମ୍ଫର ଚାଳକ ଘଟଣାସ୍ଥଳରୁ ଫେରାର ହୋଇଯାଇଥିବା ସୂଚନା ଦେଇଛି ପୁଲିସ ।
ସୂଚନା ଅନୁସାରେ ମଙ୍ଗଳବାର କିଛି ଭକ୍ତ କର୍ଭି ରେଳ ଷ୍ଟେସନରୁ ଓହ୍ଲାଇ ଅଟୋରିକ୍ସାରେ ଚିତ୍ରକୂଟ ଯାଉଥିଲେ । ଏଥିରେ ୮ ଜଣ ଯାତ୍ରୀ ଥିଲେ । ଏହି ସମୟରେ ଅମାତପୁର ନିକଟରେ ଜାତୀୟ ରାଜପଥରେ ଏକ ଡମ୍ଫର ଭରତକୁପ ଆଡୁ ତୀବ୍ର ଗତିରେ ଆସି ଅଟୋରିକ୍ସାକୁ ଧକ୍କା ଦେଇଥିଲା । ଏଥିରେ ଅଟୋଟି କ୍ଷତିଗ୍ରସ୍ତ ହେବା ସହ ସେଥିରେ ଥିବା ଯାତ୍ରୀ ଫସି ରହିଥିଲେ । ଘଟଣାସ୍ଥଳରେ ପୁଲିସ ପହଞ୍ଚି କ୍ରେନ୍ ମଗାଇବା ପରେ ଫସିଥିବା ଲୋକଙ୍କୁ ଉଦ୍ଧାର କରାଯାଇଥିଲା । ତେବେ ଏଥିରେ ଘଟଣାସ୍ଥଳରେ ୩ ଜଣଙ୍କ ମୃତ୍ୟୁ ହେବା ସହ ୫ ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ତେବେ ଆହତଙ୍କ ମଧ୍ୟରୁ ୨ ଜଣଙ୍କୁ ଡାକ୍ତର ମୃତ ଘୋଷଣା କରିଛନ୍ତି ।
