ଆଠଗଡ଼: ପବିତ୍ର ସ୍ନାନ ପୂର୍ଣ୍ଣିମାରେ ଆଠଗଡ଼ର ଆରାଧ୍ୟ ପ୍ରଭୁ ଅଟ୍ଟାଳି ଜଗନ୍ନାଥଙ୍କ ସ୍ନାନ ଯାତ୍ରା ଓ ଗଜାନନ ବେଶ ଅନୁଷ୍ଠିତ ହୋଇଯାଇଛି। ରାଜପୁରୋହିତ ସୁଶାନ୍ତ କୁମାର ମିଶ୍ର ଶ୍ରୀଜୀଉଙ୍କର ସମସ୍ତ ନୀତିକାନ୍ତି ନିର୍ଦ୍ଧାରିତ ସମୟ ମଧ୍ୟରେ ସମ୍ପନ୍ନ କରିଥିବାବେଳେ ଏଥିରେ ତାଙ୍କୁ ବଡପଣ୍ଡା ଓ ଅନ୍ୟାନ୍ୟ ସେବାୟତ ସହାୟତା କରିଥିଲେ। ପ୍ରତ୍ୟୁଷରୁ ଦ୍ବାର ଫିଟା, ମଙ୍ଗଳ ଆଳତୀ, ରୋଷ ହୋମ ଏବଂ ଚକାଛଡା ନୀତି ପରେ ତଡପ ଲାଗି ଓ ବିଜେ ଆଳତୀ କରାଯାଇଥିଲା। ପରେ ପରେ ସେବାୟତମାନେ ଗୋଟି ପହଣ୍ଡିରେ ଶ୍ରୀଜୀଉଙ୍କୁ ନେଇ ସ୍ନାନ ମଣ୍ଡପରେ ବିଜେ କରାଇଥିଲେ। ସ୍ନାନ ମଣ୍ଡପରେ ଶ୍ରୀଜୀଉଙ୍କୁ ୧୦୮ କଳସ ଜଳରେ ମହାସ୍ନାନ ନୀତି ସମ୍ପନ୍ନ କଲାପରେ ବାଳଭୋଗ ଓ ଆଳତୀ ପରେ ଅଟ୍ଟାଳି ଜଗନ୍ନାଥ ଦେବଙ୍କୁ ହାତୀ ବେଶରେ ସଜ୍ଜିତ କରାଯାଇଥିଲା। ଏହାପରେ ଶ୍ରୀଜୀଉଙ୍କ ନିକଟରେ ଶଂଖୁଡି ଭୋଗ ଲାଗି ଏବଂ ଆଳତୀ ପରେ ଗଜାନନ ବେଶରେ ଶ୍ରୀଜଗନ୍ନାଥଙ୍କୁ ଅପେକ୍ଷାରତ ଶହ ଶହ ଶ୍ରଦ୍ଧାଳୁ ଦର୍ଶନ କରିଥିଲେ। ଅପରାହ୍ନରେ ଶ୍ରୀଜଗନ୍ନାଥଙ୍କୁ ସ୍ନାନ ବେଦୀରୁ ଗୋଟି ପହଣ୍ଡିରେ ନେଇ ଅଣସର ଘରେ ବିଜେ କରାଯାଇଥିଲା। ତାପରେ ରାଜପୁରୋହିତ ସୁଶାନ୍ତ ମିଶ୍ର ରତ୍ନ ସିଂହାସନରେ ପଟ୍ଟିଦିଅଁ ପ୍ରତିଷ୍ଠା କରି ସାନ୍ଧ୍ୟ ଆଳତୀ ନୀତି ସମ୍ପନ୍ନ କରିଥିଲେ। ପରମ୍ପରା ଅନୁଯାଇ ଶ୍ରୀଜଗନ୍ନାଥ ଜ୍ୱରରେ ପୀଡିତ ହୋଇ ୧୫ ଦିନ ଅଣସର ଘରେ କରିବାକୁ ଥିବାବେଳେ ତାଙ୍କ ସ୍ଥାନରେ ରତ୍ନ ବେଦୀରେ ପଟ୍ଟିଦିଅଁ ପୂଜା ପାଇବେ। ଦେବୋତ୍ତର କାର୍ଯ୍ୟ ନିର୍ବାହୀ ଅଧିକାରୀ ତଥା ଉପଜିଲ୍ଲାପାଳ ପ୍ରହଲ୍ଲାଦ ନାରାୟଣ ଶର୍ମାଙ୍କ ପ୍ରତ୍ୟକ୍ଷ ତତ୍ତ୍ବାବଧାନରେ ଅନୁଷ୍ଠିତ ଏହି ସ୍ନାନ ଯାତ୍ରା କାର୍ଯ୍ୟକ୍ରମକୁ ଦେବୋତ୍ତର ସୁପରଭାଇଜର ଭବାନୀ ଶଙ୍କର ପଣ୍ଡା ଓ ଅନ୍ୟ କର୍ମଚାରୀ ପରିଚାଳନା କରିଥିଲେ।
Popular Categories
Previous article
Next article