ଆଠଗଡ: ଆଠଗଡ ବନାଞ୍ଚଳ ଅନ୍ତର୍ଗତ ତିଗିରିଆ ବିଟ୍ ଅଧିନ ଜେନାପଦା ଗ୍ରାମ ନିକଟରେ ସୋମବାର ସକାଳେ ଏକ ଦନ୍ତାହାତୀର ମୃତ୍ୟୁ ହୋଇଥିବା ଜଣାପଡିଛି । ତେବେ ହାତୀଟିର ଶରୀରରେ କୌଣସି କ୍ଷତ ବା ଅସ୍ୱାଭାବିକ ଚିହ୍ନ ନଥିବାରୁ ମୃତ୍ୟୁର କାରଣ ଅସ୍ପଷ୍ଟ ରହିଛି । ବିବରଣୀରୁ ପ୍ରକାଶ ଯେ, ହିନ୍ଦୋଳ ଜଙ୍ଗଲ ଅଞ୍ଚଳରୁ ତିଗିରିଆ କାଳିଚାବଲ୍ଲଭ ସଂରକ୍ଷିତ ଜଙ୍ଗଲକୁ ନିୟମିତ ଚଳପ୍ରଚଳ କରୁଥିବା ହାତୀଦଳ ଗତ କିଛିଦିନ ହେବ ତିଗିରିଆ ଓ ଆଖପାଖ ଅଞ୍ଚଳରେ ବୁଲୁଥିଲେ । ରବିବାର ଏକ ୬ଟିକିଆ ହାତୀ ଦଳ ଏ ଅଞ୍ଚଳରେ ବୁଲୁଥିବାରୁ ବନରକ୍ଷୀ ପ୍ରଶାନ୍ତ କୁମାର ପରିଡାଙ୍କ ନେତୃତ୍ୱରେ ବନ କର୍ମଚାରୀ କାଲି ରାତି ତମାମ ଉକ୍ତ ହାତୀଦଳର ଗତିବିଧି ଉପରେ ନଜର ରଖିଥିଲେ । ତେବେ ସୋମବାର ଭୋର ସମୟରେ ଜେନାପଦା ଗ୍ରାମର ଏକ ପୋଖରୀକୁ ଗୋଟିଏ ଦନ୍ତାହାତୀ ପାଣି ପିଇବାକୁ ଯାଉଥିବାବେଳେ ଖଳିତଇଲା ନିକଟରେ ଏକ ଖୋଲା ସ୍ଥାନରେ ପଡି ମୃତ୍ୟୁବରଣ କରିଥିଲା । ହାତୀ ଗୁଡିକର ଗତିବିଧି ନିରୀକ୍ଷଣ କରୁଥିବା ବନ କର୍ମଚାରୀ ସ୍ଥାନୀୟ ଲୋକଙ୍କଠାରୁ ସୂଚନା ପାଇ ଘଟଣାସ୍ଥଳରେ ପହଞ୍ଚିଥିଲେ ଏବଂ ଏ ସମ୍ପର୍କରେ ରେଞ୍ଜର ଓ ଡିଏଫଓଙ୍କୁ ଖବର ଦେଇଥିଲେ । ଡିଏଫଓ ଡାକ୍ତର ଯଜ୍ଞଦତ୍ତ ପତି, ଏସିଏଫ ଡାକ୍ତର ଚିଚିଲିଚି ବିଶ୍ୱାଳ ଓ ରେଞ୍ଜର ରବିନ୍ଦ୍ର କୁମାର ନାୟକ ତୁରନ୍ତ ଜେନାପଦାର ଉକ୍ତ ସ୍ଥାନରେ ପହଞ୍ଚି ପ୍ରାଥମିକ ଅନୁସନ୍ଧାନ କରିଥିଲେ । ମୃତ ଦନ୍ତା ହାତୀଟିର ବୟସ ୬-୮ ବର୍ଷ ଏବଂ ଉଚ୍ଚତା ୬-୭ ଫୁଟ ହବ ବୋଲି ବିଭାଗୀୟ ସୂତ୍ରରୁ ପ୍ରକାଶ । ନିକଟରେ କୌଣସି ବିଦ୍ୟୁତ ଲାଇନ ନଥିବା ଓ ମୃତ ହାତୀର ଶରୀରରେ କୌଣସି କ୍ଷତ ବା ଅସ୍ୱାଭାବିକ ଚିହ୍ନ ନଥିବାରୁ ଏହା ଏକ ସ୍ୱାଭାବିକ ରୋଗ ବା ଅଂଶୁଘାତଜନିତ ମୃତ୍ୟୁ ହୋଇ ପାରିଥାଏ ବୋଲି ସେମାନେ ଅନୁମାନ କରୁଛନ୍ତି । ସୂଚନା ପାଇ ଅନୁଗୁଳସ୍ଥିତ ଆଞ୍ଚଳିକ ମୁଖ୍ୟ ବନ ସଂରକ୍ଷକ ସୁଧାଂଶୁ ଶେଖର ଖୋରା ଏବଂ ଭୁବନେଶ୍ଵରରୁ ବନବିଭାଗର ଯୁଗ୍ମ ତଦନ୍ତକାରୀ ଦଳ(ଏସଟିଏଫ୍) ଆସି ପ୍ରାଥମିକ ଅନୁସନ୍ଧାନ ଓ ତଦନ୍ତ କରିଥିଲେ । ଆଠଗଡ ବ୍ଲକ ପ୍ରାଣୀ ଚିକିତ୍ସକ ଡାକ୍ତର ଅନ୍ତର୍ଯ୍ୟାମୀ ବାରିକ ବନବିଭାଗର ସମସ୍ତ ବରିଷ୍ଠ ଅଧିକାରୀଙ୍କ ଉପସ୍ଥିତିରେ ମୃତ ହାତୀଟିର ବ୍ୟବଛେଦ କରିଥିଲେ । ବ୍ୟବଛେଦ ବେଳେ ମଧ୍ୟ ଶରୀର ଭିତରେ କୌଣସି ଅସ୍ଵାଭାବିକ ଲକ୍ଷଣ ବା କ୍ଷତ ଦେଖିବାକୁ ମିଳିନଥିବା ଡିଏଫଓ କହିଛନ୍ତି । ହାତୀର ଭିସେରା ଓ ଅନ୍ୟାନ୍ୟ ଗୁରୁତ୍ବପୂର୍ଣ୍ଣ ଅଙ୍ଗ ଭୁବନେଶ୍ଵରସ୍ଥିତ ଓୟୁଏଟିର ବନ୍ୟଜନ୍ତୁ ସ୍ଵାସ୍ଥ୍ୟ କେନ୍ଦ୍ରକୁ ଅଧିକ ପରୀକ୍ଷା ନିରୀକ୍ଷା ପାଇଁ ପଠାଯାଇଛି । ସେଠିକାର ପରୀକ୍ଷା ରିପୋର୍ଟ ୭-୮ ଦିନ ମଧ୍ୟରେ ଆସିବା ପରେ ହାତୀଟିର ମୃତ୍ୟୁର କାରଣ ସ୍ପଷ୍ଟ ହୋଇଯିବ ବୋଲି ଡିଏଫଓ ଡାକ୍ତର ପତି ପ୍ରକାଶ କରିଛନ୍ତି । ବ୍ୟବଛେଦ ପରେ ହାତୀଟିର ଦୁଇଟିଯାକ ଦାନ୍ତ ଉଦ୍ଧାର କରିବା ସହିତ ଘଟଣାସ୍ଥଳରେ ହିଁ ମୃତଦେହକୁ ପୋତି ଦିଆଯାଇଥିଲା ।
Popular Categories
Previous article
Next article