ଆଠଗଡ଼:ଆଠଗଡ଼ ବନଖଣ୍ଡ ଅଧିନ ବଡମ୍ବା ବନାଞ୍ଚଳରେ ଏସଟିଏଫ ଦ୍ୱାରା ୨ଟି ହାତୀର ଗଳିତ ମୃତ ଦେହ ଓ କଙ୍କାଳ ମିଳିବା ଘଟଣାରେ ବଡମ୍ବା ବନାଞ୍ଚଳ ଅଧିକାରୀଙ୍କ ସମେତ ୨ଜଣ ବନପାଳ ଓ ୨ଜଣ ବନରକ୍ଷୀ ନିଲମ୍ବିତ ହୋଇଛନ୍ତି। ଏହି ଘଟଣାରେ ଜାନିପଦର ବନରକ୍ଷୀ ନରେନ୍ଦ୍ର ଦେଉରୀ ଗିରଫ ହୋଇଥିବାବେଳେ ୩ଜଣ ହାତୀ ଜଗୁଆଳି ଓ ୨ଜଣ ଜମି ମାଲିକ ଗିିରଫ ହୋଇଛନ୍ତି। ତେବେ ନିଲମ୍ବିତ ହୋଇଥିବା ମାଣିଆବନ୍ଦ ବନପାଳ ମନୋଜ ଦାସ ଓ ଗୋପପୁର ବନପାଳ ପ୍ରଦୀପ ପରିଡ଼ାଙ୍କ ସମେତ ଅନ୍ୟଜଣେ ବନରକ୍ଷୀଙ୍କୁ ଶୁକ୍ରବାର ଘଟଣା ସଂପର୍କରେ ଜେରା ପାଇଁ ବନଖଣ୍ଡ କାର୍ଯ୍ୟାଳୟକୁ ଡକା ଯାଇଥିଲା। ତେବେ ଜେରା ପୂର୍ବରୁ ଗିରଫ ହେବା ଭୟରେ ଜାନିପଦର ବନପାଳ ମନୋଜ ଦାସ ବନଖଣ୍ଡ କାର୍ଯ୍ୟାଳୟର ପାଚେରୀ ଡେଇଁ ଚମ୍ପଟ ମାରିଥିବା ଜଣାପଡ଼ିଛି। ଆଠଗଡ଼ ବନଖଣ୍ଡର କାର୍ଯ୍ୟରତ ସହକାରୀ ବନ ସଂରକ୍ଷକ (ଏସିଏଫ) ହରେକୃଷ୍ଣ ମଲ୍ଲିକ ବନପାଳଙ୍କର ଚମ୍ପଟ ମାରିବା ଘଟଣାକୁ ସ୍ୱୀକାର କରିଛନ୍ତି ଏବଂ ହାତୀ ମୃତ୍ୟୁ ଘଟଣା ସଂପର୍କରେ ଅଧିକ ତଥ୍ୟ ସଂଗ୍ରହ ପାଇଁ ତାଙ୍କୁ ପଚରା ଉଚରା କରିବା ଲାଗି ଡକାଯାଇଥିଲା ବୋଲି ପ୍ରକାଶ କରିଥିଲେ।
Comments are closed.