ନୂଆଦିଲ୍ଲୀ : ଭାରତର ସାମରିକ ଶକ୍ତି ବୃଦ୍ଧିକୁ ନେଇ ପାକିସ୍ତାନ ଭୟଭୀତ ହୋଇଯାଇଛି। ଫଳରେ ପାକିସ୍ତାନ ଏନେଇ ମିଳିତ ଜାତିସଂଘରେ ଅଭିଯୋଗ କରିଛି। ଭାରତର ସାମରିକ ଶକ୍ତି ବୃଦ୍ଧି ଆଞ୍ଚଳିକ ଶାନ୍ତି ଓ ସ୍ଥିରତା ପ୍ରତି ବିପଦ ବୋଲି ପାକିସ୍ତାନ କହିଛି। ଏହା ଯୋଗୁଁ ଆଞ୍ଚଳିକ ଭାରସାମ୍ୟ ବିଗିଡ଼ିବ ବୋଲି ପାକିସ୍ତାନ ଆଶଙ୍କା ବ୍ୟକ୍ତ କରିଛି।
ଆମେରିକା ଏବଂ ରୁଷ ନାମ ନନେଇ ମିଳିତ ଜାତିସଂଘରେ ପାକିସ୍ତାନର ପ୍ରତିନିଧି ତଥା ସଚିବ ଜାହାନଜିବ ଖାନ କହିଛନ୍ତି ଯେ ଦକ୍ଷିଣ ଏସିଆରେ ଏକ ଦେଶର ସାମରିକ ଖର୍ଚ୍ଚ ବହୁ ମାତ୍ରାରେ ବୃଦ୍ଧି ପାଇଛି ଓ ବଡ଼ ବଡ଼ ଦେଶରୁ ଅସ୍ତ୍ର କିଣୁଛି। ଏହା ଦକ୍ଷିଣ ଏସିଆର ସାମରିକ ଭାରସାମ୍ୟକୁ ବିଗାଡୁଛି। ସଂକୀର୍ଣ୍ଣ ସାମରିକ, ରାଜନୈତିକ ଏବଂ ବ୍ୟବସାୟିକ ବିଚାରଧାରା ଆଧାରରେ ଦକ୍ଷିଣ ଏସିଆ ପାଇଁ ଦୋହରା ମାନକ ନୀତିକୁ ତ୍ୟାଗ କରିବା ଆବଶ୍ୟକ। ମିଳିତ ଜାତିସଂଘରେ ସୋମବାର ଆୟୋଜିତ ନିରସ୍ତ୍ରିକରଣ ମହାସଭା ସମିତି ଆଲୋଚନାରେ ପାକିସ୍ତାନ ପ୍ରତିନିଧି ଏହା କହିଥିଲେ।
ଆତଙ୍କବାଦର ଜନକ ଭାବେ ବଦନାମ ହୋଇସାରିଥିବା ପାକିସ୍ତାନ ବିଶ୍ୱ ମଞ୍ଚରେ ନିଜ ଛବି ସୁଧାରିବାକୁ ପୁଣିଥରେ ଶାନ୍ତି ମନ୍ତ୍ରର ଗାନ କରିଛି। ଶାନ୍ତି ପାଇଁ ଦକ୍ଷିଣ ଏସିଆର ସନ୍ତୁଳନ ନ ବଗାଡ଼ିବାକୁ ଅନୁରୋଧ କରିଛି। ଏହାସହ ପାକିସ୍ତାନ ପ୍ରତିନିଧି ଆମେରିକା ଦ୍ୱାରା ପାକିସ୍ତାନ ପାଇଁ ସାମରିକ ସହାୟତା ବନ୍ଦ କରାଯିବାକୁ ନେଇ ଦୁଃଖ ବ୍ୟକ୍ତ କରିଥିଲେ। ପରୋକ୍ଷରେ ଭାରତକୁ ଆମେରିକା ଓ ରୁଷ ଭଳି ଦେଶ ଅସ୍ତ୍ର ନ ବିକିବାକୁ ଅନୁରୋଧ କରିଥିଲେ। ଆଲୋଚନା କାଳରେ ସେ ଭାରତ ଓ ଅନ୍ୟ ଦେଶର ନାମ ନେଇନଥିଲେ।
ଭାରତର ସାମରିକ ଶକ୍ତି ବୃଦ୍ଧିରେ ପାକିସ୍ତାନ ଭୟଭୀତ, ଜାତିସଂଘରେ କଲା ଅଭିଯୋଗ
Popular Categories
Previous article
Next article