ଡେସ୍କ: ଶୁକ୍ରବାର ଦିନ ଜମ୍ମୁ-କାଶ୍ମୀରରେ ହୋଇଥିବା ଏକ ଏନକାଉଣ୍ଟର ସମୟରେ ଗୁଳିରେ ଆହତ ହୋଇଥିବା ଯୋଦ୍ଧା କୁକୁର ‘ଜୁମ୍’କୁ ଭାରତୀୟ ସେନା ଶ୍ରଦ୍ଧାଞ୍ଜଳି ଅର୍ପଣ କରିଛି। ଦୁଇ ବର୍ଷୀୟ ବେଲଜିୟମ୍ ମାଲିନିଓସ୍ କୁକୁର ‘ଜୁମ’ ଗତକାଲି ୫୪ ଆଡଭାନ୍ସ ଫିଲ୍ଡ ପ୍ରାଣୀ ଚିକିତ୍ସାଳୟରେ ଶେଷ ନିଶ୍ୱାସ ତ୍ୟାଗ କରିଥିଲା। ସେ ଅକ୍ଟୋବର ୯ରେ ଜାମ୍ମୁ କାଶ୍ମୀରର ଅନନ୍ତନାଗ ତଙ୍ଗପା ଠାରେ ଆତଙ୍କବାଦ ବିରୋଧୀ ଅପରେସନ ସମୟରେ ଦୁଇଟି ଗୁଳିର ଶିକାର ହୋଇଥିଲା ଓ ପରେ ଚିକିତ୍ସା ପାଇଁ ଜୁମକୁ ୫୪ ଆଡଭାନ୍ସ ଫିଲ୍ଡ ପ୍ରାଣୀ ଚିକିତ୍ସାଳୟରେ ଭର୍ତ୍ତୀ କରାଯାଇଥିଲା।
୨୯ ଆର୍ମି ଡଗ୍ ୟୁନିଟ୍ ଜୁମକୁ ଶ୍ରଦ୍ଧାଞ୍ଜଳି ଜଣାଇଛି। ସୂଚନା ଅନୁଯାୟୀ, ଜୁମ ଅନେକ ଆତଙ୍କବାଦ ବିରୋଧୀ ଅପରେସନରେ ଶକ୍ତି ଏବଂ ସାହସର ସହିତ ମୁକାବିଲା କରିଥିଲା। ସେନା ଅଧିକାରୀମାନେ ସୂଚନା ଦେଇଛନ୍ତି, ଅନନ୍ତନାଗରେ ହୋଇଥିବା ଅପରେସନ୍ ସମୟରେ ଜୁମ୍ କେବଳ ଆତଙ୍କବାଦୀଙ୍କ ସଠିକ୍ ସ୍ଥାନ ଚିହ୍ନଟ କରିବାରେ ନୁହେଁ ବରଂ ଜଣେ ଆତଙ୍କବାଦୀକୁ ଆହତ କରିବାରେ ମଧ୍ୟ ପ୍ରମୁଖ ଭୂମିକା ଗ୍ରହଣ କରିଥିଲା। ଆହତ ହୋଇଥିଲେ ମଧ୍ୟ ଜୁମ୍ ଅନ୍ୟ ଲୁଚି ରହିଥିବା ଆତଙ୍କବାଦୀଙ୍କୁ ଚିହ୍ନଟ କରି ଟାର୍ଗେଟ ଅଞ୍ଚଳରୁ ଫେରିବା ପରେ ପ୍ରବଳ ରକ୍ତସ୍ରାବ ହେତୁ ବେହୋସ ହୋଇଯାଇଥିଲା। ଏନକାଉଣ୍ଟରରେ ଆହତ ହେବା ପରେ ଜୁମର ଅସ୍ତ୍ରୋପଚାର କରାଯାଇଥିଲା।
