ଜାମ୍ମୁ : ଜାମ୍ମୁ କାଶ୍ମୀର ପୁଞ୍ଝରେ ଗୁରୁବାର ହିମ ସ୍ଖଳନରେ ସେନାର ଜଣେ ଯବାନଙ୍କ ମୃତ୍ୟୁ ଘଟିଛି ଓ ଜଣେ ଯବାନ ଗୁରୁତର ଆହତ ହୋଇଛନ୍ତି। ଏହି ଘଟଣା ଗୁରୁବାର ସକାଳେ ହିମ ଝଡ଼ ପରେ ଘଟିଛି। ବରଫ ପାହାଡ଼ର ଏକ ବଡ଼ ଖଣ୍ଡ ନିୟନ୍ତ୍ରଣ ରେଖା (ଏଲଓସି) ନିକଟରେ ଥିବା ସେନା ପୋଷ୍ଟ ଉପରକୁ ଖସିପଡ଼ିଥିଲା। ଏହି ବରଫ ଖଣ୍ଡ ତଳେ ଚାପି ହୋଇ ଲାନ୍ସନାଏକ ସପନ ମେହରାଙ୍କ ମୃତ୍ୟୁ ଘଟିଛି ଓ ଲାନ୍ସନାଏକ ହରପ୍ରୀତ ସିଂହ ଗୁରୁତର ଆହତ ହୋଇଛନ୍ତି।
ଉଲ୍ଲେଖ ଯେ ଜାମ୍ମୁ କାଶ୍ମୀର, ଲଦାଖ ଏବଂ ହିମାଚଳ ପ୍ରଦେଶରେ ପ୍ରବଳରୁ ଅତିପ୍ରବଳ ହିମପାତ ନେଇ ବୁଧବାର ପାଣିପାଗ ବିଭାଗ ପକ୍ଷରୁ ସତର୍କ ସୂଚନା ଜାରି କରାଯାଇଥିଲା। କାଶ୍ମୀର ବାନ୍ଦିପୁରା, ବାରାମୁଳା, ଅନନ୍ତନାଗ, କୁଲଗାଓଁ, ବଡ଼ଗାଓଁ, ଗାନ୍ଧରବଳ, ହେଲ ଏବଂ କାର୍ଗିଲ ଜିଲାର ହିମସ୍ଖଳନର ସମ୍ଭାବନା ଥିବା ଅଞ୍ଚଳରେ ଜାନୁଆରୀ ୨ ସନ୍ଧ୍ୟା ୫ଟାରୁ ଜାନୁଆରୀ ୩ ସନ୍ଧ୍ୟା ୫ଟା ପର୍ଯ୍ୟନ୍ତ ହିମସ୍ଖଳନ ହେବ ବୋଲି ସତର୍କ ସୂଚନା ଜାରି କରାଯାଇଥିଲା।
