ଗୋଆ: ଗୋଆ ମୁଖ୍ୟମନ୍ତ୍ରୀ ମନୋହର ପରିକରଙ୍କ ମୃତ୍ୟୁ ପରେ ରାଜ୍ୟରେ ବିଜେପି ପାଇଁ ଅଡୁଆ ବଢ଼ିବାରେ ଲାଗିଛି। ଗୋଟିଏ ପଟେ କଂଗ୍ରେସ ସରକାର ଗଠନ କରିବାକୁ ରାଜ୍ୟପାଳଙ୍କ ନିକଟରେ ଦାବି କରୁଥିବାବେଳେ ଅନ୍ୟପଟେ ବିଜେପି ସହଯୋଗୀ ଦଳଗୁଡ଼ିକର ସମର୍ଥନ ହାତେଇବାକୁ ଉଦ୍ୟମ ଚଳାଇଛି। ସୋମବାର ଅପରାହ୍ନ ୨ଟା ସୁଦ୍ଧା ମୁଖ୍ୟମନ୍ତ୍ରୀ କିଏ ହେବେ ତାହା ବିଜେପି ପକ୍ଷରୁ କୁହାଯାଇଥିଲାବେଳେ କୌଣସି ନିଷ୍ପତ୍ତି ହୋଇପାରି ନାହିଁ। ନିଜର ବିଧାୟକଙ୍କୁ ବିଜେପି ମୁଖ୍ୟମନ୍ତ୍ରୀ କରିବାକୁ ଚାହୁଁଛି। ମେଣ୍ଟ ସରକାର ମଧ୍ୟରେ ବିଜେପିର ସର୍ବାଧିକ ବିଧାୟକ ରହିଥିବାରୁ ଦଳ ଏହା ଚାହୁଁଛି। କିନ୍ତୁ ସହଯୋଗୀ ଦଳଗୁଡ଼ିକ ଏଥିରେ ରାଜି ହେଉନାହାନ୍ତି। ସେମାନେ ଅଣ ବିଧାୟକଙ୍କୁ ମୁଖ୍ୟମନ୍ତ୍ରୀ କରାଯାଉ ବୋଲି ଦାବି କରୁଛନ୍ତି। ଏହି ଦାବି ସପକ୍ଷରେ ୧୨ ବିଧାୟକ ରହିଛନ୍ତି, ଯେଉମାନଙ୍କ ମଧ୍ୟରେ ବିଜେପିର ୩ ବିଧାୟକ ଅଛନ୍ତି। ଏହା ବ୍ୟତୀତ ମହାରାଷ୍ଟ୍ରବାଦୀ ଗୋମନ୍ତକ ପାର୍ଟି(ଏମଜିପି), ସ୍ବାଧୀନ ଏବଂ ଗୋଆ ଫରୱାର୍ଡ ପାର୍ଟିର ୩ ଜଣ ଲେଖାଏ ବିଧାୟକ ଏଭଳି ଦାବି କରିଛନ୍ତି।
ବିଶେଷ ସୂତ୍ରରୁ ଜଣାପଡ଼ିଛି ଯେ, ୪ ଜଣ ମୁଖ୍ୟମନ୍ତ୍ରୀ ଦୌଡ଼ରେ ରହିଛନ୍ତି। ସେମାନେ ହେଲେ ଉତ୍ତର ଗୋଆ ଏମପି ଶ୍ରୀପଦ ନାଏକ, ରାଜ୍ୟ ସଭା ସଦସ୍ୟ ବିନୟ ତେନ୍ଦୁଲକର, ଗୋଆ ବାଚସ୍ପତି ପ୍ରମୋଦ ସାୱନ୍ତ ଏବଂ ରାଜ୍ୟର ସ୍ବାସ୍ଥ୍ୟମନ୍ତ୍ରୀ ବିଶ୍ଵଜିତ ରାଣେ।
