ଲକ୍ଷ୍ମୀପୁର: କୋରପୁଟ ଜିଲ୍ଲା ଲକ୍ଷ୍ମୀପୁର ବ୍ଲକରେ ଅଙ୍ଗନଓ୍ବାଡ଼ି ପିଲାଙ୍କ ପାଇଁ ପୋଷାକ କିଣାରେ ଦୁର୍ନୀତି ହୋଇଥିବା ଅଭିଯୋଗ ହୋଇଛି। ସ୍ଥାନୀୟ ବିଡିଓଙ୍କ ନିକଟରେ ଅଭିଯୋଗ ପହଞ୍ଚିବା ପରେ ସେ ଏ ସମ୍ପର୍କରେ ଜିଲାପାଳ ଏବଂ ବିଭାଗୀୟ ଅଧିକାରୀଙ୍କୁ ଜଣାଇବେ ବୋଲି କହିଛନ୍ତି।
ନିୟମ ଅନୁସାରେ, ଅଙ୍ଗନଓ୍ବାଡ଼ିରେ ପଢ଼ୁଥିବା ୩ରୁ ୬ବର୍ଷର ପିଲାଙ୍କ ପାଇଁ ଦୁଇ ହଳ ଲେଖାଏ ପୋଷାକ ସରକାରଙ୍କ ପକ୍ଷରୁ ଯୋଗାଇ ଦିଆଯାଉଛି। ଏଥିପାଇଁ ପୁଅଙ୍କ ଲାଗି ହଳ ପିଛା ୧୦୦ ଟଙ୍କା ଏବଂ ଝିଅଙ୍କ ଲାଗି ୧୫୦ ଟଙ୍କା ପ୍ରଦାନ କରାଯାଉଛି। ହେଲେ ପୋଷାଷ କିଣାରେ କମିଶନ ପାଇବା ଆଶାରେ କିଛି ପରିଦର୍ଶିକା ଦୁର୍ନୀତି କରୁଥିବା ଅଭିଯୋଗ ହୋଇଛି।
ଅଭିଯୋଗ ଅନୁସାରେ, ଲକ୍ଷ୍ମୀପୁର ବ୍ଲକରେ ୧୮୮ଟି ଅଙ୍ଗନଓ୍ବାଡ଼ି କେନ୍ଦ୍ର ରହିଥିବା ବେଳେ ମୋଟପିଲା ସଂଖ୍ୟା ୩୮୧୮। ସେମାନଙ୍କ ପୋଷାକ ବାବଦ ଅର୍ଥ ପ୍ରତି ଅଙ୍ଗନଓ୍ବାଡ଼ି କେନ୍ଦ୍ରର କର୍ମୀଙ୍କ ଆକାଉଣ୍ଟକୁ ଆସିବାର ଥିଲା । ସେମାନେ ଆକାଉଣ୍ଟରୁ ଟଙ୍କା ଉଠାଇ ସ୍ଥାନୀୟ ସ୍ୱୟଂ ସହାୟିକା ଗୋଷ୍ଠୀ କିମ୍ବା ଯେକୌଣସି ଦୋକାନରୁ ଊନ୍ନତ ମାନର ପୋଷାକ କିଣିଥାଆନ୍ତେ। କିନ୍ତୁ ଏଠାରେ ତା’ର ବ୍ୟତିକ୍ରମ ଦେଖିବାକୁ ମିଳିଛି। କାର୍ଯ୍ୟରତ କିଛି ପରିଦର୍ଶିକା କର୍ମୀମାନଙ୍କଠାରୁ ଟଙ୍କା ସଂଗ୍ରହ କରି ବାହାର ଦୋକାନରୁ ପୋଷାକ କିଣିଛନ୍ତି। ପୋଷାକଗୁଡ଼ିକ ଅତି ନିମ୍ନମାନର ଏବଂ ତାହା ପିନ୍ଧିଲା ବେଳକୁ ଚିରି ଫାଟି ଯାଉଛି। ପୋଷାକ ବର୍ଷେ ପର୍ଯ୍ୟନ୍ତ ଯିବ କି ନାହିଁ ତାହା ବି ସନ୍ଦେହଘେରରେ। ପରିଦର୍ଶିକାମାନେ ନିଜ କାମ ଛାଡ଼ି କିପରି ବ୍ୟବସାୟରେ ଲିପ୍ତ ରହୁଛନ୍ତି ତାହାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
