ଅଖିଳ ଭାରତୀୟ ଆଖଡା ପରିଷଦ ବିଭାଜିତ; ୭ ଗୋଷ୍ଠୀ ବାଛିଲେ ନିଜର ସଭାପତି

ପ୍ରୟାଗରାଜ: ଗତ ସେପ୍ଟେମ୍ବର ମାସରେ ମହନ୍ତ ନରେନ୍ଦ୍ର ଗିରିଙ୍କର ଅକାଳ ବିୟୋଗ ପରେ ଅଖିଳ ଭାରତୀୟ ଆଖଡା ପରିଷଦ (ଏବିଏପି) ଆଉ ପୂର୍ବ ସ୍ଥିତିରେ ନାହିଁ । ତାଙ୍କର ଅବର୍ତ୍ତମାନରେ ଆଖଡା ପରିଷଦ ବିଭାଜିତ ହୋଇଯାଇଛି । ଏହି ପରିଷଦର ସଦସ୍ୟ ଥିବା ୧୩ଟି ଆଖଡା ମଧ୍ୟରୁ ୭ଟି ଆଖଡା ନିଜର ସଭାପତି ଏବଂ ସାଧାରଣ ସମ୍ପାଦକ ନିର୍ବାଚିତ କରିଛନ୍ତି । ଗୁରୁବାର ଦିନ ହରିଦ୍ୱାରଠାରେ ଏହା ହୋଇଛି । ସୂଚନାଯୋଗ୍ୟ ଯେ ମହନ୍ତ ନରେନ୍ଦ୍ର ଗିରିଙ୍କର ଉତ୍ତରାଧିକାରୀ ବାଛିବାକୁ ଚଳିତ ମାସ ୨୫ ତାରିଖରେ ପରିଷଦର ବୈଠକ ବସିବା ଆଶା କରାଯାଉଥିଲା । କିନ୍ତୁ ତାହା ପୂର୍ବରୁ ସେଥିରେ ବିଭାଜନ ଘଟିଛି ।
ଏକ ସୂତ୍ରରୁ କୁହାଯାଇଛି ଯେ ହରିଦ୍ୱାରଠାରେ ଅନୁଷ୍ଠିତ ବୈଠକରେ ଏବିଏପିର ଉପ ସଭାପତି ତଥା ନିର୍ମଳ ଆଖଡାର ଦେବେନ୍ଦ୍ର ସିଂ ଶାସ୍ତ୍ରୀ ଅଧ୍ୟକ୍ଷତା କରିଥିଲେ । ସେ ମହାନିର୍ବାଣୀ ଆଖଡାର ମହନ୍ତ ରବିନ୍ଦ୍ର ପୁରୀଙ୍କୁ ପରିଷଦର ସଭାପତି ଏବଂ ନିର୍ମୋହି ଆଖଡାର ମହନ୍ତ ରାଜେନ୍ଦ୍ର ଦାସଙ୍କୁ ଏହାର ସାଧାରଣ ସମ୍ପାଦକ ଭାବରେ ଘୋଷଣା କରିଥିଲେ । ତାଙ୍କର ଏଭଳି ଅତର୍କିତ ଘୋଷଣା ୧୩ ସଦସ୍ୟ ବିଶିଷ୍ଟ ଆଖଡା ପରିଷଦକୁ ଦୁଇ ଭାଗରେ ବିଭାଜିତ କରିଦେଇଥିବା କୁହାଯାଉଛି । ଗୋଟିଏ ପଟରେ ନିର୍ମୋହି, ନିର୍ବାଣୀ, ଦିଗମ୍ବର, ମହାନିର୍ବାଣୀ, ଅଟଳ, ବଡା ଉଦାସିନ ଏବଂ ନିର୍ମଳ ଆଖଡା ରହିଥିବାବେଳେ ଆଉ ଏକ ଗୋଷ୍ଠୀରେ ନିରଞ୍ଜନି, ଜୁନା, ଆବାହନ, ଆନନ୍ଦ, ଅଗ୍ନି ଏବଂ ଉଦାସିନ ଭଳି ଆଖଡା ରହିଛନ୍ତି । ପ୍ରଥମ ଗୋଷ୍ଠୀରେ ଥିବା ଦିଗମ୍ବର ଆନି ଆଖଡାର ବାବା ହାଥଯୋଗୀ ଦାବି କରିଛନ୍ତି ଯେ ସେମାନେ ନିଜ ନିଜର କାର୍ଯ୍ୟକର୍ତ୍ତା ନିର୍ବାଚିତ କରିଛନ୍ତି । କାରଣ ଏବିଏପିରେ ସେମାନଙ୍କ ଆଖଡାରୁ କେହି ପ୍ରତିନିଧିତ୍ୱ କରୁନଥିଲେ ଏବଂ ନିର୍ବାଚନରେ ସେମାନଙ୍କୁ ଅବହେଳିତ କରି ରଖାଯାଉଥିଲା ।