ସମାଜ ଡିଜିଟାଲ ଡେସ୍କ: ଦିଲ୍ଲୀ ଏମ୍ସର ଜଣେ ଡାକ୍ତର ମାତ୍ରାଧିକ ଔଷଧ ସେବନ କରି ଆତ୍ମହତ୍ୟା କରିଛନ୍ତି। ମୃତ ଡାକ୍ତର ଜଣକ ହେଉଛନ୍ତି ୩୪ ବର୍ଷୀୟ ରାଜ ଘୋନିୟା। ସେ ଜଣେ ସ୍ନାୟୁ ବିଶେଷଜ୍ଞ। ତାଙ୍କ ଘର ଗୁଜରାଟର ରାଜକୋଟରେ। ଦିଲ୍ଲୀର ଗୌତମ ନଗର ଅଞ୍ଚଳରେ ରହୁଥିବା ଘରୁ ପୁଲିସ ତାଙ୍କ ମୃତଦେହ ଜବତ କରିଛି। ମୃତଦେହ ନିକଟରୁ ଏକ ସୁଇସାଇଡ୍ ନୋଟ୍, ଔଷଧ ଏବଂ ସିରିଞ୍ଜ ମିଳିଛି। ପୁଲିସ ଜବତ କରିଥିବା ସୁଇସାଇଡ୍ ନୋଟରେ ରାଜ ଆତ୍ମହତ୍ୟା ପାଇଁ କାହାକୁ ଦାୟୀ କରିନାହାନ୍ତି।
ରବିବାର ଅପରାହ୍ନ ୨ଟାରେ ପୁଲିସ କଂଟ୍ରୋଲ ରୁମକୁ ଏକ ଫୋନ୍ ଆସିଥିଲା। ଜଣେ ଡାକ୍ତର ଆତ୍ମହତ୍ୟା କରିଥିବା ପୁଲିସକୁ ଫୋନ କରି କୁହାଯାଇଥିଲା। ପୁଲିସ ଘଟଣା ସ୍ଥଳରେ ପହଞ୍ଚି ଅଚେତ ଅବସ୍ଥାରେ ପଡ଼ିଥିବା ରାଜଙ୍କୁ ଉଦ୍ଧାର କରି ଏମ୍ସ ନେଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
