ଫିଟ୍ ହେବା ପରେ କକ୍ପିଟ୍କୁ ଫେରିବେ ଅଭିନନ୍ଦନ: ବାୟୁସେନା
ନୂଆଦିଲ୍ଲୀ: ପାକ୍ ଯୁଦ୍ଧ ବିମାନ ଏଫ-୧୬କୁ ଖସାଇ ଦେଇଥିବା ଅଭିନନ୍ଦନ ବର୍ଦ୍ଧମାନ ଭାରତ ଫେରିବା ପରେ ଚିକିତ୍ସିତ ହେଉଛନ୍ତି। ସେ ସୁସ୍ଥ ହୋଇ ଫିଟ୍ ହେବା ପରେ ପୁଣି ଥରେ ବିମାନ କକପିଟକୁ ଫେରିବେ ବୋଲି ସ୍ପଷ୍ଟ କରିଛି ଭାରତୀୟ ବାୟୁସେନା। ବାୟୁସେନା ମୁଖ୍ୟ ବିରେନ୍ଦର ସିଂହ ଧାନୱା ସୋମବାର ଏକ ସାମ୍ବାଦିକ ସମ୍ମିଳନୀରେ ପିଓକେରେ ବିମାନ ଆକ୍ରମଣ ସମ୍ପର୍କରେ ସ୍ପଷ୍ଟୀକରଣ ଦେବା ଅବସରରେ ଏହି ସୂଚନା ଦେଇଥିଲେ।
ଅଭିନନ୍ଦନ ପାକିସ୍ତାନରୁ ଫେରିବା ପରେ ସେନା ହସ୍ପିଟାଲରେ ତାଙ୍କର ଚିକିତ୍ସା ଚାଲିଛି। ପାକ୍ ସେନା ହେପାଜତରେ ଥିବା ବେଳେ ତାଙ୍କୁ ନିର୍ଯାତନା ଦିଆଯାଇଥିଲା। ଏପରି କି ତାଙ୍କ ମେରୁଦଣ୍ଡର ନିମ୍ନ ଭାଗରେ ଆଘାତ ଲାଗିଥିବା ଚିକିତ୍ସା ବେଳେ ଜଣାପଡ଼ିଛି। ଏହି ଅବସରରେ ଅଭିନନ୍ଦନ ବାୟୁସେନା ଅଧିକାରୀଙ୍କୁ ଭେଟିବା ସମୟରେ ଖୁବଶୀଘ୍ର ପୁଣି ଥରେ ବିମାନ କକପିଟକୁ ଫେରିବାକୁ ଚାହୁଁଥିବା ପ୍ରକାଶ କରିଥିଲେ। ଏ ସମ୍ପର୍କରେ ସାମ୍ବାଦିକମାନେ ସୋମବାର ଧାନୱାଙ୍କୁ ପ୍ରଶ୍ନ କରିବାକୁ ସେ କହିଥିଲେ ଯେ, ଅଭିନନ୍ଦନ ବର୍ତ୍ତମାନ ଚିକିତ୍ସାଧୀନ ରହିଛନ୍ତି। ଆମେ କୌଣସି ରିସ୍କ ନେବାକୁ ଚାହୁଁନାହୁଁ। ସେ ସମ୍ପୂର୍ଣ୍ଣ ସୁସ୍ଥ ହେବା ପରେ ବିମାନକୁ ଫେରିବେ।
