ବଜ୍ରପାତରେ ୧୫ମୃତ, ୫ ଆହତ

କଲକାତା : ୨୪ଘଣ୍ଟା ମଧ୍ୟରେ ସମଗ୍ର ରାଜ୍ୟରେ ବଜ୍ରପାତରେ ୧୫ଜଣଙ୍କ ମୃତ୍ୟୁ ଘଟିଥିବାବେଳେ ସେମାନଙ୍କ ମଧ୍ୟରୁ ପୁରୁଲିଆରେ ୮ଜଣଙ୍କ ମୃତ୍ୟୁ ଘଟିଛି। ସେହିପରି ସୁନ୍ଦରବନରେ ବଜ୍ରପାତରେ ତିନିଜଣଙ୍କ ମୃତ୍ୟୁ ଘଟିଥିବାବେଳେ ଝାଡ଼ଗ୍ରାମରେ ଦୁଇଜଣଙ୍କ ମୃତ୍ୟୁ ଘଟିଛି। ପାରା ଥାନା ଇଲାକାରେ ମଧ୍ୟ ଦୁଇଜଣଙ୍କ ମୃତ୍ୟୁ ଘଟିଛି। ସେହିପରି ଦିଘା ଉଦୟପୁର ନିକଟରେ ବଜ୍ରାପାତରେ ଦୁଇଜଣ ଗୁରୁତର ଭାବେ ଆହତ ହେବାରୁ ସେମାନଙ୍କୁ ସ୍ଥାନୀୟ ଉଦୟପୁର ହାସପାତାଳରେ ଭର୍ତ୍ତି କରାଯାଇଛି। ଆହତ ଦୁଇଜଣ ପର୍ଯ୍ୟଟକ ଥିଲେ ବୋଲି ପୁଲିସ ସୂତ୍ରରୁ ଜଣାପଡ଼ିଛି। ପୁରୁଲିଆରେ ବଜ୍ରପାତଦ୍ୱାରା ୮ଜଣଙ୍କ ମୃତ୍ୟୁ ଘଟିଥିବାବେଳେ ୫ଜଣଙ୍କୁ ଗୁରୁତର ଅବସ୍ଥାରେ ସ୍ଥାନୀୟ ହାସପାତାଳରେ ଭର୍ତ୍ତି କରାଯାଇଛି। ଆହତଙ୍କ ମଧ୍ୟରେ ଦୁଇଜଣ ମହିଳା ଅଛନ୍ତି ବୋଲି ପୁଲିସ ପକ୍ଷରୁ କୁହାଯାଇଛି।
ପୁୁରୁଲିଆ ଥାନା ପୁଲିସ ସୂତ୍ରରୁ ଜଣାପଡ଼ିଛି ଯେ ନିକଟସ୍ଥ ବାବାବଜାର ଗ୍ରାମର ଏକ ପରିବାରର ୮ଜଣ ସଦସ୍ୟ ଚାଷ ଜମିରେ କାମ କରୁଥିବାବେଳେ ହଠାତ୍‍ ପ୍ରବଳ ବର୍ଷା ସାଙ୍ଗକୁ ବଜ୍ର ପଡ଼ିଥିଲା। ଯାହାଦ୍ୱାରା ବଜ୍ରାଘାତରେ ଘଟଣାସ୍ଥଳରେ ୮ଜଣଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ୫ଜଣ ମହିଳା ଓ ୩ଜଣ ପୁରୁଷ ଥିବା କୁହାଯାଇଛି। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ମୃତ ଦେହଗୁଡ଼ିକୁ ଉଦ୍ଧାର କରି ପୁରୁଲିଆ ହାସପାତାଳକୁ ପଠାଇଛି। ସେହିପରି ଆହତ ଅନ୍ୟ ଜଣଙ୍କୁ ମଧ୍ୟ ସ୍ଥାନୀୟ ଲୋକଙ୍କ ସହାୟତାରେ ହାସପାତାଳରେ ଭର୍ତ୍ତି କରାଯାଇଛି। ଘଟଣାକୁ କେନ୍ଦ୍ରକରି ଅଞ୍ଚଳରେ ଶୋକର ଛାୟା ଖେଳିଯାଇଛି। ସେହିପରି ପୁରୁଲିଆର ସାଓତାଲଡିହିଠାରେ ଦୁଇ ମହିଳାଙ୍କ ସହ ୫ଜଣ ଗୁରୁତର ଭାବେ ଆହତ ହେବାରୁ ସେମାନେ ହାସପାତାଳରେ ଚିକିତ୍ସାଧୀନ ଅଛନ୍ତି।