ନୂଆଦିଲ୍ଲୀ: ଜାତୀୟ ଖାଦ୍ୟ ସୁରକ୍ଷା ଯୋଜନାକୁ ପ୍ରୋତ୍ସାହନ ଦେବା ଉଦ୍ଦେଶ୍ୟରେ ଆଜି ତେଲେଙ୍ଗାନା, ଆନ୍ଧ୍ରପ୍ରଦେଶ, ମହାରାଷ୍ଟ୍ର ଏବଂ ଗୁଜରାଟରେ ଗୋଟିଏ ଦେଶ ଗୋଟିଏ ରେସନ କାର୍ଡ ଯୋଜନା ପରୀକ୍ଷାମୂଳକ ଭାବେ ଆରମ୍ଭ କରାଯାଇଛି। ଏହିସବୁ ରାଜ୍ୟର ଖାଦ୍ୟ ସୁରକ୍ଷା କାର୍ଡ ପାଇଥବା ହିତାଧିକାରୀମାନେ ସେହି ରାଜ୍ୟର ଯେ କୌଣସି ଦୋକାନରୁ ରିହାତି ମୂଲ୍ୟରେ ଚାଉଳ ଏବଂ ଗହମ କ୍ରୟ କରିପାରିବେ। ଏହି ପ୍ରକ୍ରିୟାରେ ହିତାଧିକାରୀମାନଙ୍କୁ ରେସନ କାର୍ଡକୁ ଆଧାର କାର୍ଡ ସହ ସଂଯୋଗ କରିବାକୁ ପଡିବ।
ତେଲେଙ୍ଗାନା ରେସନ କାର୍ଡ ହିତାଧିକାରୀମାନଙ୍କୁ ଏହି ଯୋଜନାରେ ପୋର୍ଟାବିଲଟି ସୁବିଧା ମଧ୍ୟ ମିଳୁଛି, ଯେଉଁଥିରେ ସେମାନେ ରିହାତି ଦରରେ ଖାଦ୍ୟ ସାମଗ୍ରୀ କ୍ରୟ କରିପାରିବେ। ଗୋଟିଏ ଦେଶ ଗୋଟିଏ ରେସନ କାର୍ଡ ଯୋଜନାରେ ଆନ୍ଧ୍ରପ୍ରଦେଶର ହିତାଧିକାରୀମାନେ ମଧ୍ୟ ଏହି ସୁବିଧା ପାଇପାରିବେ। ମିଳିଥିବା ସୂଚନା ଅନୁଯାୟୀ, ଆସନ୍ତା ବର୍ଷ ଅଗଷ୍ଟ ସୁଦ୍ଧା ସମସ୍ତ ରାଜ୍ୟରେ ଏହି ଯୋଜନା କାର୍ଯ୍ୟକାରୀ କରାଯିବାକୁ ନିଷ୍ପତ୍ତି ହୋଇଛି। ଗତ ସପ୍ତାହରେ ତେଲେଙ୍ଗାନା ଯୋଗାଣ ନିଗମ ପକ୍ଷରୁ ଏହି ବ୍ୟବସ୍ଥାର ପୁନରାବୃତ୍ତି କରାଯାଇଥିଲା। ତେଲେଙ୍ଗାନାରେ ୨୦୧୮ରେ ୨ କୋଟି ୮୦ ଲକ୍ଷ ହିତାଧିକାରୀ ଏହି ଯୋଜନାରେ ଲାଭ ପାଇଥିବା ବେଳେ ଖାଦ୍ୟ ସୁରକ୍ଷା ଯୋଜନାରେ ୫୬ ଲକ୍ଷ ହିତାଧିକାରୀ ଉପକୃତ ହୋଇଛନ୍ତି। ଆନ୍ଧ୍ରପ୍ରଦେଶ, ମହାରାଷ୍ଟ୍ର ଏବଂ ଗୁଜୁରାଟରେ ଏହି ଯୋଜନାରେ ସାମିଲ ହେବାକୁ ଥିବା ହିତାଧିକାରୀ ଚୟନ ଶେଷ ହୋଇଛି।
