ଚେନ୍ନାଇ: ଅନ୍ୟ ଜାତିରେ ବିବାହ କରିବାରୁ ଏକ ନବଦମ୍ପତିଙ୍କୁ ହତ୍ୟା କରାଯାଇଛି। ତାମିଲନାଡୁର ତୁତୁକୁଡି ଜିଲାରେ ଏପରି ହତ୍ୟାକାଣ୍ଡ ଘଟିଛି। କେତେଜଣ ଅଜଣା ବ୍ୟକ୍ତି ଏହି ନବଦମ୍ପତିଙ୍କୁ ହତ୍ୟା କରିଛନ୍ତି। ପୁଲିସ ଏହାକୁ ଏକ ଘୃଣ୍ୟ ଅପରାଧ ବୋଲି ଦର୍ଶାଇଛି। ହତ୍ୟାର ଶିକାର ହୋଇଥିବା ନବବିବାହିତା ମହିଳା ୩ମାସ ଗର୍ଭବତୀ ଥିବା ଜଣାପଡ଼ିଛି। ସପ୍ତାହକ ମଧ୍ୟରେ ରାଜ୍ୟରେ ଏହା ଦ୍ବିତୀୟ ଘଟଣା। ନିକଟରେ କୋଇମ୍ବାଟୁରରେ ମଧ୍ୟ ଭିନ୍ନ ଜାତିରେ ବିବାହ କରିଥିବା ଏକ ଦମ୍ପତିଙ୍କୁ ହତ୍ୟା କରାଯାଇଥିଲା।
ତୁତୁକୁଡି ଜିଲାର କୁଲାୟୁର ପୁଲିସ ସୂଚନା ମୁତାବକ, ହତ୍ୟାର ଶିକାର ହୋଇଥିବା ଦମ୍ପତି ହେଲେ ୨୪ ବର୍ଷୀୟ ସୋଲାଇରାଜନ ଏବଂ ୨୧ ବର୍ଷୀୟା ଜ୍ୟୋତି। ଉଭୟେ ଦିନ ମଜୁରିଆ ଥିଲେ। ସୋଲାଇରାଜନ ପରାୟର ସମ୍ପ୍ରଦାୟର ହୋଇଥିବାବେଳେ ଜ୍ୟୋତି ପଲ୍ଲର ସମ୍ପ୍ରଦାୟର ଥିଲେ। ଉଭୟେ ପରସ୍ପରଙ୍କୁ ଭଲ ପାଉଥିବାବେଳେ ବିବାହ କରିବାକୁ ସ୍ଥିର କରିଥିଲେ। କିନ୍ତୁ ପରିବାର ଲୋକେ ସେମାନଙ୍କ ବିବାହ ସମ୍ମତି ଦେଇ ନ ଥିଲେ। ଫଳରେ ଗତ ଏପ୍ରିଲରେ ଦୁଇଜଣ ଘର ଛାଡ଼ି ପଳାଇବା ସହ ପ୍ରେମବିବାହ କରିଥିଲେ। ପରେ ପୁଅ ଘର ଲୋକେ ସେମାନଙ୍କୁ ସ୍ବୀକାର କରିଥିଲେ। କିନ୍ତୁ ଗତ ଗୁରୁବାର ଉଭୟଙ୍କୁ ହତ୍ୟା କରାଯାଇଥିଲା। ଏହି ଘଟଣାରେ ପୁଲିସ ଝିଅର ବାପା ଅଲାଗରକୁ ସନ୍ଦେହରେ ଗିରଫ କରିଛି। ସେମାନଙ୍କ ହତ୍ୟା ପଛରେ ଅଲାଗରର ହାତ ଥିବା ପୁଲିସ ସନ୍ଦେହ କରୁଛି। ବୁଧବାର ବିଳମ୍ବିତ ରାତିରେ ସେମାନଙ୍କୁ ଛୁରି ଭୁଷି ହତ୍ୟା କରାଯାଇଥିବା ଜଣାପଡ଼ିଛି। ଗୁରୁବାର ସକାଳେ ପୁଲିସ ସେମାନେ ରହୁଥିବା ଏକ ଘରୁ ଉଭୟଙ୍କ ରକ୍ତ ଜୁଡୁବୁଡୁ ମୃତଦେହ ଜବତ କରିଛି। ଘଟଣାରେ କେଉଁମାନେ ସମ୍ପୃକ୍ତ ଅଛନ୍ତି ସେ ନେଇ ପୁଲିସ ତଦନ୍ତ ଚଳାଇଛି।
