ନୂଆଦିଲ୍ଲୀ : ଶୁକ୍ରବାର କେନ୍ଦ୍ର ସରକାର ୨୦୧୯-୨୦ ଆର୍ଥିକବର୍ଷ ନିମନ୍ତେ ସାଧାରଣ ବଜେଟ୍ ଉପସ୍ଥାପନ କରିବାକୁ ଯାଉଛନ୍ତି। ସଂସଦରେ ଅର୍ଥ ମନ୍ତ୍ରୀ ନିର୍ମଳା ସୀତାରମଣ ବଜେଟ୍ ଆଗତ କରିବେ। ପୂର୍ବାହ୍ନ ୧୧ଟା ସମୟରେ ଅର୍ଥମନ୍ତ୍ରୀ ସଂସଦରେ ତାଙ୍କର ବଜେଟ୍ ଭାଷଣ ରଖିବେ । ଦ୍ବିତୀୟବାର କ୍ଷମତାକୁ ଆସିବା ପରେ ମୋଦୀ ସରକାରଙ୍କର ଏହା ହେଉଛି ପ୍ରଥମ ବଜେଟ୍ । ତେବେ ଚଳିତବର୍ଷ ଦ୍ବିତୀୟ ଥର ପାଇଁ ମଧ୍ୟ ସଂସଦରେ ଏହି ବଜେଟ୍ ଉପସ୍ଥାପନ କରାଯିବ। ଦେଶରେ ସାଧାରଣ ନିର୍ବାଚନ ଥିବା ଦୃଷ୍ଟିରୁ ଫେବୃଆରୀରେ କେନ୍ଦ୍ର ଅର୍ଥମନ୍ତ୍ରୀ ପୀୟୂଷ ଗୋୟଲ ଅନ୍ତରୀଣ ବଜେଟ୍ ଉପସ୍ଥାପନ କରିଥିଲେ । ଅନ୍ୟପକ୍ଷରେ ଅନ୍ତରୀଣ ବଜେଟ୍କୁ ମିଶାଇଲେ ଏହା ହେଉଛି ଦେଶର ୮୯ତମ ବଜେଟ୍ ।
ସାଧାରଣତଃ କେନ୍ଦ୍ର ବଜେଟ୍ ଉପସ୍ଥାପନର ସମୟସୀମା ୯୦ରୁ ୧୨୦ ମିନିଟ୍ ମଧ୍ୟରେ ରହିଥାଏ । ଚଳିତଥର ବଜେଟ୍ରେ ମଧ୍ୟ ଏହି ସମାନ ଅବଧି ଆଶା କରାଯାଉଛି । ଅତିବେଶୀରେ ବଜେଟ୍ ଉପସ୍ଥାପନ ସମୟସୀମା ଦିନ ୧ ଟା ଯାଏ ରହିପାରେ । ପ୍ରଚଳିତ ବ୍ୟବସ୍ଥା ଅନୁଯାୟୀ, ୨୦୧୬ ଯାଏ ଦେଶର ସାଧାରଣ ବବଜେଟ୍ ଫେବୃଆରୀ ମାସର ଶେଷ ଦିବସରେ ଆଗତ କରାଯାଇଥାଏ । ୨୦୧୭ରେ ପୂର୍ବତନ ଅର୍ଥ ମନ୍ତ୍ରୀ ଅରୁଣ ଜେଟ୍ଲୀ ପ୍ରଥମ ଥର ପାଇଁ ଏହି ଧାରାକୁ ଭାଙ୍ଗି ଫେବୃଆରୀ ପହିଲାରେ ବଜେଟ୍ ଆଗତ କରିଥିଲେ । ସେହିବର୍ଷ ମଧ୍ୟ ସରକାର ଦୀର୍ଘ ୯୨ ବର୍ଷ ଧରି ପ୍ରଚଳିତ ପୃଥକ ରେଳ ବଜେଟ୍ ଉପସ୍ଥାପନ ଧାରାରେ ପୂର୍ଣ୍ଣଚ୍ଛେଦ ଟାଣିଥିଲେ । ତେଣୁ ଶୁକ୍ରବାର ସାଧାରଣ ବଜେଟ୍ ସହ ରେଳ ବଜେଟ୍ ଉପସ୍ଥାପନ କରାଯିବ ।
Comments are closed.