ଲାହୋର : ପାକିସ୍ତାନର ଆତଙ୍କବାଦ ନିରୋଧ ବିଭାଗ (ସିଟିଡି)ରେ ବୁଧବାର ୨୬/୧୧ ମୁମ୍ବଇ ଆକ୍ରମଣର ମାଷ୍ଟରମାଇଣ୍ଡ ହାଫିଜ ସୟିଦଙ୍କ ସମେତ ୩ ସଂଗଠନର ୧୩ ଜଣଙ୍କ ବିରୋଧରେ ମାମଲା ରୁଜୁ ହୋଇଛି।
ଆତଙ୍କବାଦୀଙ୍କୁ ପାଣ୍ଠି ଯୋଗାଣ ଅଭିଯୋଗରେ ସେମାନଙ୍କ ବିରୋଧରେ ୨୩ଟି ମାମଲା ରୁଜୁ ହୋଇଥିବା ଜାଣିବାକୁ ମିଳିଛି। ପାକିସ୍ତାନ ଆତଙ୍କବାଦ ନିରୋଧ ବିଭାଗର ଜଣେ ଅଧିକାରୀ କହିଛନ୍ତି ଯେ ହାଫିଜ ଓ ତାର ୧୨ ଘନିଷ୍ଠ ଜନକଲ୍ୟାଣ ନାମରେ ପାଣ୍ଠି ସଂଗ୍ରହ କରି ଆତଙ୍କବାଦ ଗତିବିଧିରେ ବିନିଯୋଗ କରୁଥିଲେ। ସୂଚନା ଅନୁସାରେ ଜମାତ- ଉଦ- ଦାବା ୫ଟି ଟ୍ରଷ୍ଟ ଯୋଗେ ପାଣ୍ଠି ସଂଗ୍ରହ କରୁଥିଲା। ସେହିପରି ଲସ୍କର-ଇ-ତୋଇବା ଏବଂ ଫଲାହ-ଇ-ଇନ୍ସାନିୟତ ସଂଗଠନର କେତେକ ଟ୍ରଷ୍ଟ ଯୋଗେ ପାଣ୍ଠି ସଂଗ୍ରହ କରୁଥିଲେ। ଏହି ପାଣ୍ଠିକୁ ଆତଙ୍କବାଦକୁ ପ୍ରୋତ୍ସାହନ ଦେବା କ୍ଷେତ୍ରରେ ବିନିଯୋଗ କରାଯାଉଥିଲା। ତେଣୁ ଏହି ଟ୍ରଷ୍ଟ ସହ ସମ୍ପୃକ୍ତ ନେତା ଓ ସଂଗଠନଗୁଡ଼ିକର ମୁଖ୍ୟଙ୍କ ବିରୋଧରେ ମାମଲା ରୁଜୁ ହୋଇଛି। ଏନେଇ ଲାହୋର ସମେତ ୩ଟି ସହରରେ ୨୩ଟି ମାମଲା ରୁଜୁ କରାଯାଇଛି। ଟ୍ରଷ୍ଟଗୁଡ଼ିକ ମଧ୍ୟରେ ଅଲ-ଅନଫାଲ, ଦାୱତ-ଉଲ-ଇର୍ଶାଦ, ଅଲ ହମଦ, ଅଲ ମଦିନା ଏବଂ ମୌଜ ବିନ ଜବଲ ନାମ ରହିଛି। ଏହି ସମସ୍ତ ମାମଲାର ଶୁଣାଣି ଆତଙ୍କବାଦ ନିରୋଧ କୋର୍ଟରେ ହେବ।
Comments are closed.