ଲକ୍ଷ୍ନୌ: ନିଜ ଜୀବନକୁ ବାଜି ଲଗାଇ ଖବର ସଂଗ୍ରହ କରୁଥିବା ସାମ୍ବାଦିକମାନେ ଏବେ ଅସୁରକ୍ଷିତ ହୋଇପଡ଼ିଛନ୍ତି। ଉତ୍ତରପ୍ରଦେଶରେ କ୍ରମାଗତ ୨ଟି ଘଟଣା ଏବେ ଦେଶବ୍ୟାପୀ ଚର୍ଚ୍ଚାର ବିଷୟ ପାଲଟିଛି। ମୁଖ୍ୟମନ୍ତ୍ରୀଙ୍କ ବିରୋଧରେ ଟ୍ବିଟ୍ କରିବାରୁ ଜଣେ ସାମ୍ବାଦିକଙ୍କୁ ଗିରଫ କରାଯିବା ପରେ ଏବେ ଆଉ ଜଣେ ସାମ୍ବାଦିକଙ୍କୁ ରେଲୱେ ପୁଲିସ ମାଡ଼ ମାରିଛି। କେବଳ ଏତିକି ନୁହେଁ ପୁଲିସ କର୍ମଚାରୀମାନେ ତାଙ୍କ ଉପରେ ପରିସ୍ରା କରିଛନ୍ତି। ଏଭଳି ଏକ ଅମାନବୀୟ ଘଟଣା ଦେଖିବାକୁ ମିଳିଛି ଉତ୍ତରପ୍ରଦେଶର ଶାମଲି ସହରରେ। ପୁଲିସର ଏହି ବର୍ବରତାର ଦୃଶ୍ୟ ସୋସିଆଲ ମିଡିଆରେ ଭାଇରାଲ ହେବା ପରେ ମୋରାଦାବାଦ ଏସପି ସୁବାସ ଚନ୍ଦ୍ର ଦୁବେ ଅଭିଯୁକ୍ତ ଜିଆରପି ଇନ୍ସପେକ୍ଟର ରାକେଶ କୁମାର ଏବଂ କନଷ୍ଟେବଳ ସଞ୍ଜୟ ପାୱାରଙ୍କୁ ନିଲମ୍ବନ କରିଛନ୍ତି। ଏହି ଘଟଣାକୁ ବିଭିନ୍ନ ମହଲରେ ଅସନ୍ତୋଷ ପ୍ରକାଶ ପାଇଛି।
ସମ୍ପୃକ୍ତ ସାମ୍ବାଦିକ ଶାମଲି ସହରରେ ଏକ ମାଲଗାଡ଼ି ଲାଇନଚ୍ୟୁତ ହେବା ପରେ ତାହାର ଖବର ସଂଗ୍ରହ କରିବାକୁ ଯାଇଥିଲେ। ଏହି ସମୟରେ ସାଦା ପୋଷାକରେ ଥିବା ଜିଆରପି ଇନ୍ସପେକ୍ଟର ରାକେଶ କୁମାର ଏବଂ ତାଙ୍କ ସହକର୍ମୀମାନେ ସମ୍ପୃକ୍ତ ସାମ୍ବାଦିକଙ୍କୁ ମାଡ଼ ମାରିଥିଲେ। ଇନ୍ସପେକ୍ଟର ତାଙ୍କୁ ଚାପୁଡ଼ା ମାରିଥିଲେ। ସେ ତଳେ ପଡ଼ିଯିବା ପରେ ତାଙ୍କ ସହକର୍ମୀମାନେ ତାଙ୍କୁ ନିସ୍ତୁକ ମାଡ଼ ମାରିଥିଲେ। ପରେ ତାଙ୍କୁ ସେଠାରୁ ଜିଆରପି ଥାନାକୁ ନିଆଯାଇଥିଲା। ସେଠାରେ ହାଜତ ଭିତରେ ବି ତାଙ୍କୁ ମାଡ଼ ମରାଯାଇଥିଲା। ଏପରି କି ଜଣେ କର୍ମଚାରୀ ତାଙ୍କୁ ମୁହଁରେ ପରିସ୍ରା କରିଥିଲେ ବୋଲି ସାମ୍ବାଦିକ ଜଣକ ଅଭିଯୋଗ କରିଛନ୍ତି।
