ବେଙ୍ଗାଲୁରୁ: ଶ୍ରୀଲଙ୍କାରେ ରବିବାର ଘଟିଥିବା ଆତଙ୍କବାଦୀ ଆକ୍ରମଣରେ ୨ ଜେଡିଏସ୍ ନେତାଙ୍କ ମୃତ୍ୟୁ ଘଟିଛି। ଏଥିସହ ଅନ୍ୟ ୫ ଜଣ ଜେଡିଏସ ନେତା ନିଖୋଜ ରହିଛନ୍ତି। କର୍ନାଟକ ମୁଖ୍ୟମନ୍ତ୍ରୀ ଏଚ.ଡି. କୁମାରସ୍ବାମୀ ସୋମବାର ଏ ସମ୍ପର୍କରେ ଟ୍ବିଟ୍ କରି ଜଣାଇଛନ୍ତି।
କୁମାରସ୍ବାମୀ ଟ୍ବିଟ୍ରେ ଲେଖିଛନ୍ତି ଯେ, ‘କର୍ନାଟକରୁ ୭ ଜଣ ଜେଡିଏସ ନେତା କଲୋମ୍ବୋ ବୁଲିବାକୁ ଯାଇଥିଲେ। କିନ୍ତୁ ଆତଙ୍କବାଦୀ ଆକ୍ରମଣରେ ସେମାନଙ୍କ ମଧ୍ୟରୁ ୨ ଜଣଙ୍କ ମୃତ୍ୟୁ ଘଟିବା ଖବର ମିଳିବା ପରେ ମୁଁ ଅତ୍ୟନ୍ତ ମର୍ମାହତ। ଅନ୍ୟ ୫ ନେତା ବର୍ତ୍ତମାନ ସୁଦ୍ଧା ନିଖୋଜ ରହିଛନ୍ତି। ସେମାନଙ୍କ ପତ୍ତା ମିଳୁନାହିଁ। ଏ ସମ୍ପର୍କରେ ସେ ଭାରତୀୟ ଦୂତାବାସ ସହ ଯୋଗାଯୋଗ ରଖିଛନ୍ତି।’
ସୂଚନାଯୋଗ୍ୟ, ଏହି ୭ ଜେଡିଏସ ନେତା ଗତ ୨୦ ତାରିଖରେ କଲୋମ୍ବୋ ବୁଲିବାକୁ ଯାଇଥିଲେ। ସେମାନେ କଲୋମ୍ବୋ ସ୍ଥିତ ଶାଙ୍ଗରି-ଲା ହୋଟେଲରେ ରହୁଥିଲେ। ରବିବାର ଆତଙ୍କବାଦୀଙ୍କ ଦ୍ବାରା ସିରିଜ ବିସ୍ଫୋରଣ କରାଯାଇଥିବାବେଳେ ଉକ୍ତ ହୋଟେଲରେ ମଧ୍ୟ ବିସ୍ଫୋରଣ ଘଟିଥିଲା। ଏହା ପରଠାରୁ ଉକ୍ତ ନେତାମାନଙ୍କ ସହିତ ପରିବାର ଲୋକମାନେ ଯୋଗାଯୋଗ କରିପାରୁ ନାହାନ୍ତି। ସେମାନଙ୍କ ମଧ୍ୟରୁ ଅଧିକାଂଶଙ୍କ ଘର ଚିକ୍କାବଲ୍ଲାରପୁର ଜିଲାରେ ବୋଲି ଜଣାପଡ଼ିଛି। ଚିକ୍କାବଲ୍ଲାରପୁର ଲୋକସଭା ଆସନରୁ ପ୍ରାର୍ଥୀ ହୋଇଥିବା କଂଗ୍ରେସ ନେତା ବୀରାପ୍ପା ମୋଇଲିଙ୍କ ପାଇଁ ଏହି ଜେଡିଏସ ନେତାମାନେ ପ୍ରଚାର କାର୍ଯ୍ୟ ସାରିବା ପରେ ଛୁଟି କାଟିବାକୁ କଲୋମ୍ବୋ ଯାଇଥିଲେ।
