ଚେନ୍ନଇ : ତାମିଲନାଡୁରେ ନିର୍ବାଚନୀ ପ୍ରଚାର ବେଳେ ରାଜ୍ୟ ବିଜେପି ଉପାଧ୍ୟକ୍ଷ ନୈନାର ନଗେନ୍ଦ୍ରଙ୍କ ଉପରକୁ କାଚ ବୋତଲ ମାଡ଼ କରାଯାଇଛି। ତେବେ ବୋତଲ ଯାଇ ତାଙ୍କର ଜଣେ ସହଯୋଗୀଙ୍କ ଦେହରେ ବାଜିଥିଲା। ଏଥିରେ ବ୍ୟକ୍ତି ଜଣଙ୍କ ଲହୁ ଲୁହାଣ ହୋଇପଡ଼ିଥିଲେ। ଏହି ଘଟଣା ଅପ୍ରେଲ ୧ ତାରିଖର ବୋଲି କୁହାଯାଇଛି। ଘଟଣା ପରେ ନିର୍ବାଚନୀ ପ୍ରଚାର ର୍ୟାଲିରେ ଥିବା ଲୋକମାନେ ଏଣେତେଣେ ଦୌଡ଼ିଥିଲେ। ଏଥିରେ କିଛି ଲୋକ ଆହତ ହୋଇଥିବା କୁହାଯାଉଛି।
ସୂଚନାଯୋଗ୍ୟ ଯେ ତାମିଲନାଡୁ ରାମନାଥପୁରମ ଲୋକସଭା ଆସନରୁ ରାଜ୍ୟ ବିଜେପି ଉପାଧ୍ୟକ୍ଷ ନଗେନ୍ଦ୍ର ପ୍ରାର୍ଥୀ ହୋଇଛନ୍ତି। ଏଥିପାଇଁ ଦ୍ୱିତୀୟ ପର୍ଯ୍ୟାୟରେ ଅପ୍ରେଲ ୧୮ରେ ଭୋଟ ଗ୍ରହଣ କରାଯିବ। ଏନ୍ଡିଏରେ ସାମିଲ ଦଳଙ୍କ ଆପୋଷ ବୁଝାମଣା ପରେ ଏହି ଆସନ ବିଜେପି ଭାଗକୁ ଯାଇଥିଲା। ଏଠାରେ ୟୁପିଏ ପକ୍ଷରୁ ଇଣ୍ଡିଆନ ୟୁନିୟନ ମୁସଲିମ୍ ଲିଗ୍ (ଆଇୟୁଏମ୍ଏଲ୍)ର ନୱାସକଣି ପ୍ରାର୍ଥୀ ହୋଇଛନ୍ତି। ରାମନାଥପୁର ଲୋକସଭା ଆସନ ପାଇଁ ୨୩ ଜଣ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଛନ୍ତି। ଏଥିପାଇଁ ସବୁ ଦଳଗୁଡ଼ିକ ନିର୍ବାଚନୀ ପ୍ରଚାରକୁ ତ୍ୱରାନ୍ୱିତ କରିଛନ୍ତି। ଏ କ୍ରମରେ ବିଜେପି ର୍ୟାଲି ଉପରେ କାଚ ବୋତଲ ମାଡ଼ ହୋଇଛି।
୨୦୧୪ ଲୋକସଭା ନିର୍ବାଚନରେ ଏହି ଆସନରୁ ଏଆଇଏଡିଏମ୍କେ ନେତା ଅନୱର ରାଜା ବିଜୟୀ ହୋଇଥିଲେ।
Comments are closed.