କଲକାତା/ମୁମ୍ବଇ : ଆଇପିଏଲ ୨୦୧୯ରେ ରବିବାର ଦୁଇଟି ମ୍ୟାଚ ଅନୁଷ୍ଠିତ ହେଉଛି। ଅପରାହ୍ନ ୪ଟାରେ କଲକାତାରେ କୋଲକାତା ନାଇଟ ରାଇଡର୍ସ ଏବଂ ସନ୍ ରାଇଜର୍ସ ହାଇଦ୍ରାବାଦ ମଧ୍ୟରେ ମୁକାବିଲା ଅନୁଷ୍ଠିତ ହେବ।
ଅନ୍ୟପକ୍ଷରେ ରାତି ୮ଟାରେ ମୁମ୍ବଇଠାରେ ମୁମ୍ବାଇ ଇଣ୍ଡିଆନ୍ସ ଏବଂ ଦିଲ୍ଲୀ କ୍ୟାପିଟାଲ୍ସ ମଧ୍ୟରେ ୩ ମ୍ୟାଚ ଅନୁଷ୍ଠିତ ହେବ।
ତେବେ ଶନିବାର ଅନୁଷ୍ଡଠିତ ପ୍ରଥମ ମ୍ୟାଚରେ ଚେନ୍ନାଇ ସୁପରକିଙ୍ଗ୍ସ ୭ ଉଇକେଟରେ ରୟାଲ ଚାଲେଞ୍ଜର୍ସ ବାଙ୍ଗାଲୋର(ଆରସିବି)କୁ ପରାସ୍ତ କରିଛି। ଚେନ୍ନାଇରେ ଖେଳାଯାଇଥିବା ଏହି ମ୍ୟାଚରେ ବାଙ୍ଗାଲୋର ପ୍ରଥମେ ବ୍ୟାଟିଂ କରି ୧୭.୧ ଓଭରରେ ସମସ୍ତ ଉଇକେଟ ହରାଇ ୭୦ ରନ ସଂଗ୍ରହ କରିଥିଲା। ଜବାବରେ ଚେନ୍ନାଇ ସୁପରକିଙ୍ଗ୍ସ ୩ ଉଇକେଟ ହରାଇ ୧୭.୪ ଓଭରରେ ବିଜୟ ଲକ୍ଷ୍ୟ ହାସଲ କରିନେଇଥିଲା। ଚେନ୍ନାଇ ପକ୍ଷରୁ ରାୟୁଡୁ ସର୍ବାଧିକ ୨୮ ରନ୍ କରିଥିଲେ।
ବୋଲରମାନଙ୍କୁ ସୁହାଉଥିବା ଏହି ପିଚ୍ରେ ବାଙ୍ଗାଲୋର ପ୍ରଥମରୁ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ବିରାଟ କୋହଲି ମାତ୍ର ୬ ରନ କରିବାରେ ସକ୍ଷମ ହୋଇଥିଲେ। ପାର୍ଥିବ ପଟେଲ(୩୫ ରନ)ଙ୍କୁ ଛାଡ଼ି ଅନ୍ୟ କୌଣସି ବ୍ୟାଟ୍ସମ୍ୟାନ ଦୁଇ ଅଙ୍କ ଛୁଇଁ ପାରି ନ ଥିଲେ। ଚେନ୍ନାଇ ପକ୍ଷରୁ ହରଭଜନ ସିଂହ ଏବଂ ତାହିର ୩ଟି ଲେଖାଏ ଉଇକେଟ ନେଇଥିବାବେଳେ ରବୀନ୍ଦ୍ର ଜାଡେଜା ୨ଟି ଉଇକେଟ ନେବାରେ ସଫଳ ହୋଇଥିଲେ।
୭୧ ରନ୍ର ବିଜୟ ଲକ୍ଷ୍ୟକୁ ପିଛା କରି ବ୍ୟାଟିଂ ଆରମ୍ଭ କରିଥିବା ଚେନ୍ନାଇ ମଧ୍ୟ ପ୍ରଥମରୁ ଉଇକେଟ ହରାଇଥିଲା। ଦଳର ସ୍କୋର ୮ ରନ ହୋଇଥିବାବେଳେ ୩ୟ ଓଭରର ପ୍ରଥମ ବଲରେ ସେନ୍ ୱାଟସନ ବିନା କୌଣସି ରନ କରି ଆଉଟ ହୋଇଯାଇଥିଲେ। ଏହା ପରେ ରାୟୁଡୁ ଏବଂ ସୁରେଶ ରାଇନା ସ୍ଥିତି ସମ୍ଭାଳିଥିଲେ। ଦଳର ସ୍କୋର ୪୦ ରନ ହୋଇଥିବାବେଳେ ରାଇନା ଏବଂ ପରେ ୫୯ ରନରେ ରାୟୁଡୁ ଆଉଟ ହୋଇଥିଲେ। ହରଭଜନ ସିଂହ ମ୍ୟାନ ଅଫ ଦ ମ୍ୟାଚ୍ ବିବେଚିତ ହୋଇଥିଲେ।
