ସମାଜ ଡିଜିଟାଲ ଡେସ୍କ: ଇଥୋପିଆରେ ୧୨ହଜାର ବର୍ଷ ପରେ ରବିବାର ହଠାତ୍ ଫାଟିଲା ଜ୍ୱାଳାମୁଖୀ । ଏହି ବିସ୍ଫୋରଣରୁ ନିର୍ଗତ ପାଉଁଶ ଏବଂ ସଲଫର ଡାଇଅକ୍ସାଇଡ୍ ପ୍ରାୟ ୧୫ହଜାର କିଲୋମିଟର ଉଚ୍ଚତାରେ ପହଞ୍ଚିଥିଲା । ଏହା ଲାଲ ସାଗର ଦେଇ ବ୍ୟାପି ୟେମେନ ଏବଂ ଓମାନରେ ପହଞ୍ଚିଥିଲା ।
ବିଳମ୍ବିତ ରାତିରେ ଏହି ଜ୍ୱାଳାମୁଖୀର ପାଉଁଶ ଇଥୋପିଆରୁ ୪,୩୦୦ କିଲୋମିଟର ଦୂର ଦିଲ୍ଲୀର ଆକାଶକୁ ମଧ୍ୟ ଅଚ୍ଛାଦିତ କରିଥିଲା । ଇଣ୍ଡିଆ ମେଟ୍ ସ୍କାଏ ୱେଦର ଆଲର୍ଟ ରିପୋର୍ଟ କରିଛି ଯେ ଏହି ପାଉଁଶ ମେଘ ରାଜସ୍ଥାନର ଯୋଧପୁର-ଜୈସଏମେରରୁ ଭାରତରେ ପ୍ରବେଶ କରିଛି ଏବଂ ଏବେ ଉତ୍ତର-ପୂର୍ବ ଆଡକୁ ଗତି କରୁଛି ।
ଏହି ପାଉଁଶ ମେଘ ରାଜସ୍ଥାନ, ହରିୟାଣା ଏବଂ ଦିଲ୍ଲୀ ଉପରେ ବ୍ୟାପୁଛି । ଏହା ଗୁଜୁରାଟକୁ ମଧ୍ୟ ଛୁଇଁପାରେ । ଏହା ରାତିରେ ପଞ୍ଜାବ, ପଶ୍ଚିମ ଉତ୍ତର ପ୍ରଦେଶର ପାହାଡି ଅଞ୍ଚଳ ଏବଂ ହିମାଚଳ ପ୍ରଦେଶକୁ ପ୍ରଭାବିତ କରିବାର ଆଶଙ୍କା କରାଯାଉଛି । ଏହାକୁ ଦୃଷ୍ଟିରେ ରଖି ଏୟାର ଇଣ୍ଡିଆ ୧୧ଟି ବିମାନ ବାତିଲ ଘୋଷଣା କରିଛି ।
ବିଶେଷଜ୍ଞଙ୍କ ମତରେ ଏହି ପାଉଁଶ ମେଘର ଉଚ୍ଚତା ଏତେ ଅଧିକ ଯେ ସାଧାରଣ ଲୋକଙ୍କ ଜୀବନ ଉପରେ ଏହାର ପ୍ରଭାବ ସର୍ବନିମ୍ନ ହେବ । ତଥାପି, ଅଳ୍ପ ପରିମାଣର ପାଉଁଶ ପଡିବାର ଆଶା କରାଯାଉଛି । ଆଇଏମଡିବି ଅନୁଯାୟୀ ଏହି ପାଉଁଶ ସନ୍ଧ୍ୟା ୭ଟା ୩୦ମିନିଟ୍ ସୁଦ୍ଧା ଭାରତ ଛାଡି ଚୀନ ଆଡକୁ ମୁହାଁଇବ ।
