ଭୁବନେଶ୍ଵର: କେନ୍ଦ୍ର ସରକାରଙ୍କ ଦ୍ୱାରା ୮ମ କେନ୍ଦ୍ରୀୟ ବେତନ ଗଠନରେ ଅହେତୁକ ବିଳମ୍ବ ଘଟିଛି। ୮ମ କେନ୍ଦ୍ରୀୟ ବେତନ କମିଶନର ସୁପାରିସ ଦ୍ୱାରା ସରକାରୀ କର୍ମଚାରୀ ଓ ପେନସନଭୋଗୀମାନଙ୍କୁ ନ୍ୟାୟ ମିଳିବା ଦରକାର। କେନ୍ଦ୍ର ସରକାର ୨୦୨୫ ଜୁଲାଇ ୧୬ ତାରିଖରେ ଦିଲ୍ଲୀ ବିଧାନସଭା ନିର୍ବାଚନ ପୂର୍ବରୁ ୮ତମ କେନ୍ଦ୍ରୀୟ ବେତନ କମିଶନ ଗଠନ କରିବା ନିଷ୍ପତ୍ତି ନେଇଥିଲେ। କିନ୍ତୁ ସେହି ନିଷ୍ପତ୍ତି ପରେ ସରକାର ଏହାକୁ ଆଗକୁ ନ ନେଇ ଥଣ୍ଡା ଘରେ ରଖିଦେଇଥିଲେ। ଏବେ ବିହାର ନିର୍ବାଚନ ପୂର୍ବରୁ, ଅର୍ଥାତ୍ ମୂଳ ଘୋଷଣାର ୧୦ ମାସ ପରେ, ୨୮ ଅକ୍ଟୋବର ୨୦୨୫ରେ କେନ୍ଦ୍ର କ୍ୟାବିନେଟ ୮ମ କେନ୍ଦ୍ରୀୟ ବେତନ କମିଶନ ଗଠନ କରିବା ନିଷ୍ପତ୍ତି ନେଇଛନ୍ତି।
ନରେନ୍ଦ୍ର ମୋଦୀ ନେତୃତ୍ଵାଧୀନ ସରକାରଙ୍କୁ ଏହାର ଅଧ୍ୟକ୍ଷ ଓ ଅର୍ଦ୍ଧକାଳୀନ ସଦସ୍ୟ ନିଯୁକ୍ତି କରିବାକୁ ୧୦ ମାସ ଲାଗିଗଲା। ଆୟୋଗକୁ ତାହାର ରିପୋର୍ଟ ଦେବା ପାଇଁ ୧୮ ମାସର ସମୟ ଦିଆଯାଇଛି, ଯାହାର ଅର୍ଥ ହେଉଛି ଆମେ ୮ମ ବେତନ କମିଶନର ରିପୋର୍ଟ କିମ୍ବା ସୁପାରିସ ୨୦୨୭ ମଧ୍ୟଭାଗରେ ହିଁ ଦେଖିପାରିବୁ। ସରକାର ଯଦି ସତରେ ଏହା ଧାର୍ଯ୍ୟ ସମୟରେ କରନ୍ତି, ତାହେଲେ ମଧ୍ୟ ଏହାର ଅବଧି ୨୦୨୭ ଶେଷ ପର୍ଯ୍ୟନ୍ତ ଚାଲି ଯାଇପାରେ। ଏହାର ଅର୍ଥ, କେନ୍ଦ୍ର ଓ ରାଜ୍ୟ ସରକାରୀ କର୍ମଚାରୀଙ୍କୁ ତାଙ୍କ ବେତନ ପୁନଃନିର୍ଦ୍ଧାରଣ ପାଇଁ ଆଉ ଦୁଇ ବର୍ଷ ଅପେକ୍ଷା କରିବାକୁ ପଡ଼ିବ ଯାହା ଘୋର ଅନ୍ୟାୟ ଅଟେ।
ସରକାରଙ୍କ ଦ୍ୱାରା ୮ମ କେନ୍ଦ୍ରୀୟ ବେତନ କମିଶନଙ୍କୁ ଦିଆଯାଇଥିବା ଟର୍ମସ୍ ଅଫ୍ ରେଫରେନ୍ସ(ToR) ଗୁଡିକ ଏପରି କଠୋର ଯେ, ଏହା କମିଶନଙ୍କ ସୁପାରିସ ଉପରେ ଅନେକ କଟକଣା କରିଦେଇଛି। ତେଣୁ କେନ୍ଦ୍ର ଵିଜେପି ନେତୃତ୍ଵାଧୀନ ଏନଡିଏ ସରକାରଙ୍କ ଏହି ଵିଳମ୍ଵିତ କେନ୍ଦ୍ରୀୟ ବେତନ କମିଶନ ଗଠନ ଓ ଟର୍ମସ୍ ଅଫ୍ ରେଫରେନ୍ସ କର୍ମଚାରୀମାନଙ୍କ ବେତନ ଅଥବା ପେନସନଭୋଗୀଙ୍କ ପ୍ରତି ପରିହାସ ସଦୃଶ ବୋଲି ଏଆଇଟିୟୁସି ଓଡ଼ିଶା ରାଜ୍ୟ କମିଟି ପକ୍ଷରୁ ଅନ୍ୟତମ ରାଜ୍ୟ ସମ୍ପାଦକ ଜୟନ୍ତ ଦାସ ଏକ ପ୍ରେସ ଵିଜ୍ଞାପ୍ତିରେ ପ୍ରକାଶ କରିଛନ୍ତି।
