ପିପିଲି :ପବିତ୍ର କାର୍ତ୍ତୀକ ମାସରେ ପୁରୀ ଶ୍ରୀମନ୍ଦିରରେ କୋଠଭୋଗ ପାଇଁ ପିପିଲି ଅଞ୍ଚଳରୁ ନଡିଆ ପଠାଯାଇଛି । ଓରକଳ ପଞ୍ଚାୟତ ଅନ୍ତର୍ଗତ ଗୋବର୍ଦ୍ଧନପୁର ସ୍ଥିତ ପ୍ରଭୁ ଶ୍ରୀ ଗତିଶ୍ୱରଦେବଙ୍କ ପୀଠରୁ ବୁଧବାର ନାମସଂକୀର୍ତ୍ତନ ସହ ଏକ ସ୍ୱତନ୍ତ୍ର ଗାଡିଯୋଗେ ଶ୍ରୀମନ୍ଦିରକୁ ୯ଶହରୁ ଊର୍ଦ୍ଧ୍ବ ନଡିଆ ପଠାଯାଇଛି । ଗତ ୨୦୧୫ ମସିହାରୁ ଦୀର୍ଘ ୧୦ବର୍ଷ ଧରି କାର୍ତ୍ତୀକ ମାସରେ ଶ୍ରୀମନ୍ଦିରରେ ମହାପ୍ରଭୁଙ୍କ କୋଠଭୋଗ ଲାଗି ପିପିଲି ଅଞ୍ଚଳରୁ ଶ୍ରଦ୍ଧାଳୁମାନେ ଏହି ନଡିଆ ପଠାଇ ଆସୁଛନ୍ତି ।
ଗୋବର୍ଦ୍ଧନପୁର ଅଞ୍ଚଳର ଜଗନ୍ନାଥପ୍ରେମୀ ପୂର୍ଣ୍ଣଚନ୍ଦ୍ର ସାହୁଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ପ୍ରତ୍ୟେକ ବର୍ଷ ଏହି ସେବାକାର୍ଯ୍ୟ ଜାରି ରହିଛି । ଗତବର୍ଷ ୨୪ଶହ କଡା (ଗୋଟା) ନଡିଆ ଶ୍ରୀମନ୍ଦିରକୁ ପଠାଯାଇଥିବା ବେଳେ ଚଳିତ ବର୍ଷ ଓରକଳ ପଞ୍ଚାୟତ, ପମସରା ପଞ୍ଚାୟତ, ପୋପରଙ୍ଗା ପଞ୍ଚାୟତ, ଗୋବିନ୍ଦପୁର ପଞ୍ଚାୟତ ଓ ଜଗନ୍ନାଥପୁର ପଞ୍ଚାୟତରୁ ସଂଗୃହିତ ୯ଶହରୁ ଊର୍ଦ୍ଧ୍ବ ନଡିଆ ପଠାଯାଇଛି । ମହାପ୍ରଭୁଙ୍କ କୋଠଭୋଗ ପାଇଁ ପଠାଯାଇଥିବା ଏହି ନଡିଆକୁ ଶ୍ରୀମନ୍ଦିର ପଶ୍ଚିମଦ୍ୱାର ଠାରେ ଭାରପ୍ରାପ୍ତ କୋଠଭୋଗ ସହକାରୀଙ୍କୁ ପ୍ରଦାନ କରାଯାଇଥିଲା । ମହାପ୍ରଭୁଙ୍କ ସେବା ଲାଗି ନଡିଆ ପ୍ରଦାନ କରି ପିପିଲି ଅଞ୍ଚଳର ଶ୍ରଦ୍ଧାଳୁମାନେ ନିଜକୁ ଭାଗ୍ୟବାନ ମନେ କରୁଥିବା କହିଛନ୍ତି ।
