ନୂଆଦିଲ୍ଲୀ: ପୁଲୱାମା ଆକ୍ରମଣ ପରେ ଆତଙ୍କବାଦ ବିରୋଧ ଯୁଦ୍ଧରେ ଭାରତ ସହିତ ଯୁକ୍ତରାଷ୍ଟ୍ର ଆମେରିକା, ବ୍ରିଟେନ ଏବଂ ଫ୍ରାନ୍ସ ସାମିଲ ହୋଇଛନ୍ତି। ଜୈଶ-ଇ-ମହମ୍ମଦର ମୁଖ୍ୟ ମସୁଦ ଅଜହରକୁ ବିଶ୍ଵ ଆତଙ୍କବାଦୀ ଘୋଷଣା କରିବା ସହିତ କଳା ତାଲିକାଭୁକ୍ତ କରିବା ପାଇଁ ବୁଧବାର ଯୁକ୍ତରାଷ୍ଟ୍ର ଆମେରିକା, ବ୍ରିଟେନ ଏବଂ ଫ୍ରାନ୍ସ ପକ୍ଷରୁ ପୁଣି ଏହି ପ୍ରସ୍ତାବ ଉପସ୍ଥାପନ କରାଯାଇଛି । ମସୁଦ ଅଜହରର ଅସ୍ତ୍ରଶସ୍ତ୍ର ଏବଂ ବିଦେଶ ଯାତ୍ରା ଉପରେ ପ୍ରତିବନ୍ଧକ ଲଗାଯିବା ସହ ତାର ସମ୍ପତ୍ତିକୁ ଜବତ କରିବା ପାଇଁ ଆମେରିକା, ବ୍ରିଟେନ ଏବଂ ଫ୍ରାନ୍ସର ୧୫ ଜଣିଆ ସଦସ୍ୟ ମିଳିତ ଜାତିସଂଘ ସୁରକ୍ଷା ପରିଷଦ ପ୍ରତିବନ୍ଧ ସମିତିକୁ ପ୍ରସ୍ତାବ ଦେଇଛନ୍ତି। ଏହି ପ୍ରସ୍ତାବ ଉପସ୍ଥାପନ ହେବା ପରେ ଗତ ୧୦ ବର୍ଷ ମଧ୍ୟରେ ଚତୁର୍ଥ ଥର ଅଜହରକୁ ବିଶ୍ଵ ଆତଙ୍କବାଦୀ ଘୋଷିତ କରିବାକୁ ମିଳିତ ଜାତିସଂଘରେ ଦାବି ହୋଇଛି।
ମସୁଦ ଅଜହର ଉପରେ ପ୍ରତିବନ୍ଧକ ଲାଗିଲେ ଚୀନ ଏହାକୁ ଅଟକାଇବାକୁ ଚେଷ୍ଟା କରିବ, ଏହି ସମ୍ଭାବନାକୁ ମଧ୍ୟ ଏଡେଇ ଦିଆଯାଇ ପାରିବନାହିଁ । ଏହା ପୂର୍ବରୁ ମଧ୍ୟ ଅନେକ ଥର ଚୀନ ନିଜର ଭିଟୋ କ୍ଷମତା ବଳରେ ମସୁଦ ବିରୋଧରେ ଅଣାଯାଇଥିବା ପ୍ରସ୍ତାବକୁ ପାରିତ ହେବାକୁ ଦେଇନାହିଁ । କିନ୍ତୁ ଏପର୍ଯ୍ୟନ୍ତ ଏହି ପ୍ରସ୍ତାବ ଉପରେ ଚୀନର କୌଣସି ବୟାନ ମିଳିନାହିଁ।
