ଧର୍ମଗଡ : ମଦୁଆ ବରକୁ ବାହା ହେବାକୁ ମନା କରିଦେଲା କନ୍ୟା। ଫଳରେ ଶିଶୁପାଳ ହୋଇ ବରକୁ ଫେରିବାକୁ ପଡ଼ିଛି। ଏହି ଘଟଣା ଜୁନାଗଡ ଥାନା ଅନ୍ତର୍ଗତ ଦୁନ୍ଦେଲମାଲ ଗ୍ରାମରେ ଦେଖିବାକୁ ମିଳିଛି। ଜାତି ସମାଜ ଏହାର ଆପୋଷ ସମାଧାନ ପାଇଁ ଆଲୋଚନା କରିଥିଲେ ମଧ୍ୟ କୌଣସି ଫଳ ମିଳିନାହିଁ।
ସୂଚନା ଅନୁସାରେ, ଧର୍ମଗଡ ବସ୍ତିପଡାର ତ୍ରିନାଥ ନାଏକଙ୍କ ପୁଅ ଅମିତର ବାହାଘର ଜୁନାଗଡ ଥାନା ଅନ୍ତର୍ଗତ ଦୁନ୍ଦେଲମାଲ ଗ୍ରାମର ସଧର୍ମ ନାଏକଙ୍କ ଝିଅ ସହିତ ସ୍ଥିର ହୋଇଥିଲା। ବିବାହ ପାଇଁ ବର ପକ୍ଷ ଶୁକ୍ରବାର (୨୨ ତାରିଖ) ବର ଯାତ୍ରୀ ସହ କନ୍ୟା ଘରେ ପହଞ୍ଚିଥିଲେ। ବାଜା ରୋଷଣୀ ସହ ଧୁମଧାମରେ କନ୍ୟା ଘରେ ପହଞ୍ଚିବା ପରେ ସେଠାରେ ନିଜେ ବର ମଦ୍ୟ ପାନ କରି ଅସଞ୍ଜତ ହୋଇ ପଡିଥିଲେ। ଏହାକୁ ଦେଖି କନ୍ୟା ଏହି ବର ସହିତ ବାହା ହେବାକୁ ସଫା ସଫା ମନା କରିଦେଇଥିଲା। ଫଳରେ ବାଧ୍ୟ ହୋଇ ବର ଫେରି ଆସିଥିଲା। ଏହି ଘଟଣାକୁ ନେଇ ମାଳି ସମାଜ ପକ୍ଷରୁ ଶନିବାର ସମାଧାନ ପାଇ ଉଦ୍ୟମ କରାଯାଇଥିଲା। ଜିଲା ସଭାପତି ଲୋକେଶ୍ୱର ନାଏକ, ଉପ ସଭାପତି ତ୍ରିନାଥ ନାଏକ, ସମ୍ପାଦକ ଅଚ୍ୟୁତାନନ୍ଦ ନାଏକ, ଜୁନାଗଡ ସଭାପତି ଶ୍ରୀକାନ୍ତ ପୁଝାରୀ, ଉପ ସଭାପତି ରବିଶଙ୍କର ପୁଝାରୀ, ଅଜାମ୍ବିଳ ପୁଝାରୀ, ଶ୍ୟାମଘନ ପୁଝାରୀ, ଧୃବଚରଣ ନାଏକ, ଲକ୍ଷ୍ମଣ ଭୋଇ, କୈଳାଶ ନାଏକ ପ୍ରମୁଖଙ୍କ ଉପସ୍ଥିତିରେ ବହୁତ ବୁଝା ସୁଝା କରିାବା ସତ୍ତେ୍ବ କନ୍ୟା ଏହି ବାହାଘର ପାଇଁ ରାଜି ହୋଇ ନଥିଲା। ଜିଲାରେ ବିଷାକ୍ତ ମଦ ମୃତ୍ୟୁ ଘଟଣା ନେଇ କିଛି ବର୍ଷ ତଳେ ଚର୍ଚ୍ଚା ହୋଇଥିଲା। ଏବେ ମଦ ପାଇଁ ବେଦୀରୁ ବରକୁ ଫେରାଇ ଦେବା ଭଳି ଘଟଣା ଦେଖିବାକୁ ମିଳିଛି। ଏହାକୁ ନେଇ ଅଞ୍ଚଳରେ ଭିନ୍ନ ଭିନ୍ନ ଚର୍ଚ୍ଚା ହେଉଥିବା ବେଳେ ମଦକୁ ବନ୍ଦ କରିବାକୁ ଦାବି ଜୋର ଧରୁଛି।
