ରେଙ୍ଗାଲି: ଦୈନିକ ଖବରକାଗଜ ‘ସମାଜ’ରେ ଖବର ପ୍ରକାଶ ପାଇବା ପରେ ଭାଙ୍ଗିଲା ପ୍ରଶାସନର ନିଦ। ସମ୍ବଲପୁର ଜିଲ୍ଲାର ରେଙ୍ଗାଲି ବ୍ଲକ ରେଙ୍ଗାଲି ଗ୍ରାମପଞ୍ଚାୟତ ଅନ୍ତର୍ଗତ ଆଦିବାସୀ ଅଧ୍ୟୁଷିତ ଜାମବାହାଲ ଗ୍ରାମରେ ରହିଛି ଏକ ପ୍ରାଥମିକ ବିଦ୍ୟାଳୟ। ବିଦ୍ୟାଳୟରେ ୫ଟି ଶ୍ରେଣୀ ପାଇଁ ଜଣେ ଶିକ୍ଷକ ଥିବା ଏବଂ ଗୋଟିଏ କୋଠରୀରେ ୩ଟି ଶ୍ରେଣୀର ପାଠ ଚାଲିଥିବା ଆଦି ଦୁରବସ୍ଥା ସଂକ୍ରାନ୍ତରେ ଡିସେମ୍ବର ୪ ତାରିଖରେ ଖବର ପ୍ରକାଶିତ ହୋଇଥିଲା। ଖବର ପ୍ରକାଶିତ ହେଲା ପରେ ପ୍ରଶାସନର କୁମ୍ଭକର୍ଣ୍ଣ ନିଦ୍ରା ଭାଙ୍ଗିଛି। ଜିଲ୍ଲାପାଳଙ୍କ ନିର୍ଦ୍ଦେଶରେ ନୂତନ ଶ୍ରେଣୀ କୋଠରୀ ନିର୍ମାଣ ପାଇଁ ୨୦ ଲକ୍ଷ ଟଙ୍କା ମଞ୍ଜୁର ହୋଇ କାମ ପାଇଁ ଟେଣ୍ଡର ଆହ୍ବାନ କରାଯାଇଛି ବୋଲି ବିଡିଓ ପ୍ରୀତମ କୁମାର ତନ୍ତୀ ସୂଚନା ଦେଇଛନ୍ତି। ଏହାବ୍ୟତୀତ ସ୍କୁଲର ଏକ ମାତ୍ର ଛାତ ପଡ଼ିଥିବା କୋଠରି ଛାତରୁ ବର୍ଷା ଋତୁରେ ପାଣି ଗଳୁ ଥିବାରୁ ଛାତର ମରାମତି ତଥା ଛାତ ଉପରେ ବ୍ଳୁ-ସିଟ୍ ଲଗାଇବା କାମ ଆରମ୍ଭ ହୋଇଛି। ଶ୍ରେଣୀ କୋଠରୀର ଛାତରୁ ସିମେଣ୍ଟ ଅତଡା ଖସି ପଡୁଥିବାରୁ ଗତ ଜାନୁଆରୀ ମାସରୁ ସ୍କୁଲ ବାରଣ୍ଡାରେ ପାଠପଢା ଚାଲିଛି। ଏଣୁ ଶୀଘ୍ର ନୂତନ ଶ୍ରେଣୀ କୋଠରୀ ନିର୍ମାଣ କାମ ଆରମ୍ଭ କରି ସମ୍ପୂର୍ଣ୍ଣ କରିବାକୁ ଦାବି ହେଉଛି। ଉପରୋକ୍ତ ପଦକ୍ଷେପ ବ୍ୟତୀତ ଦୀର୍ଘ ବର୍ଷ ହେଲା ଏହି ସ୍କୁଲର ୫ଟି ଶ୍ରେଣୀ ପାଇଁ ଜଣେ ଶିକ୍ଷକ ଶିକ୍ଷାଦାନ କରୁଥିବାରୁ ଆଉ ଜଣେ ଶିକ୍ଷକଙ୍କୁ ଜିଲ୍ଲା ଶିକ୍ଷା ଅଧିକାରୀଙ୍କ ନିର୍ଦ୍ଦେଶରେ ଡେପୁଟେସନରେ ନିଯୁକ୍ତି ଦିଆଯାଇଥିବା ଜଣାପଡ଼ିଛି।
Popular Categories
Previous article
Next article