କେନ୍ଦୁଝରଗଡ଼଼: ପ୍ରଥମ ବିଶ୍ୱ ଧ୍ୟାନ ଦିବସ ଅବସରରେ ଶନିବାର ଧରଣୀଧର ବିଶ୍ୱବିଦ୍ୟାଳୟ କେନ୍ଦୁଝରର ଜାତୀୟ ସେବା ଯୋଜନା ପକ୍ଷରୁ ବିଶ୍ୱବିଦ୍ୟାଳୟ ପରିସରରେ ବିଶ୍ୱ ଧ୍ୟାନ ଦିବସ ପାଳିତ ହୋଇଯାଇଛି। ବିଶ୍ୱବିଦ୍ୟାଳୟ ଓ ଆର୍ଟ ଅଫ୍ ଲିଭିଙ୍ଗ କେନ୍ଦୁଝର ଶାଖା ମିଳିତ ଆନୁକୂଲ୍ୟରେ ଆୟୋଜିତ ଏହି ଶିବିରରେ ସ୍ନାତକୋତ୍ତର ପରିଷଦର ଅଧ୍ୟକ୍ଷ ପ୍ରାଧ୍ୟାପକ ପ୍ରଭୁପ୍ରସାଦ ଦାସ ମୁଖ୍ୟଅତିଥି ଭାବେ ଯୋଗଦେଇ ସୁସ୍ଥ ମନ ଓ ଶରୀରର ଆଧାର ଧ୍ୟାନର ବିକଳ୍ପ ନାହିଁ ବୋଲି ପ୍ରକାଶ କରିଥିଲେ। ଆର୍ଟ ଅଫ୍ ଲିଭିଙ୍ଗ କେନ୍ଦୁଝର ଶାଖାର ସଞ୍ଚାଳିକା ଗୀତିଶ୍ରୀ ମହାନ୍ତ ମୁଖ୍ୟବକ୍ତା ଭାବେ ଯୋଗଦେଇ ଧ୍ୟାନ ମଣିଷକୁ ସୁସ୍ଥ ଓ ଶୃଙ୍ଖଳିତ କରିଥାଏ ବୋଲି ମତ ରଖିବା ସହ ଭାରତୀୟ ଯୋଗ ଦର୍ଶନ ବିଶ୍ୱକୁ ନୂଆ ପରିଚୟ ଦେଇଛି ବୋଲି କହିଥିଲେ। ଜାତୀୟ ସେବା ଯୋଜନା ସଂଯୋଜିକା ଡ.ସରିତା ନାୟକ ସେବା ଯୋଜନାର ସୁଦୂରପ୍ରସାରୀ କାର୍ଯ୍ୟକ୍ରମ ଓ ଲକ୍ଷ୍ୟ ଉପସ୍ଥାପନ କରିଥିଲେ। କାର୍ଯ୍ୟକ୍ରମ ଅଧିକାରୀ ଅଧ୍ୟାପକ ଦିନେଶ ମହାରଣା ପ୍ରାରମ୍ଭରେ ସ୍ୱାଗତ ଭାଷଣ ଓ ଅତିଥି ପରିଚୟ ପ୍ରଦାନ କରିଥିବା ବେଳେ ଏହି ଶିବିରରେ ଶତାଧିକ ସ୍ୱେଛାସେବୀ ସାମିଲ ହୋଇଥିଲେ। ଶେଷରେ ସଂସ୍କୃତ ବିଭାଗ ମୁଖ୍ୟ ଡ. ଅରୁନ୍ଧତୀ ଓଝା ଧନ୍ୟବାଦ ଅର୍ପଣ କରିଥିଲେ।
Comments are closed.