ସମାଜ ଡିଜିଟାଲ ଡେସ୍କ: ମହାରାଷ୍ଟ୍ରରେ ସରକାର ଗଠନ କରିବ ମହାୟୁତି। ବିଜେପି ନେତୃତ୍ଵାଧୀନ ମହାୟୁତି ମେଣ୍ଟକୁ ମିଳିବ ବହୁମତ। ସେହିପରି ଝାଡ଼ଖଣ୍ଡରେ ବିଜେପି ଏବଂ ଜେଏମଏମ ମଧ୍ୟରେ କଡ଼ା ଟକ୍କର ହୋଇପାରେ। ଏଠାରେ ସ୍ଥିତି ଅସ୍ପଷ୍ଟ ରହିଛି। ଏଭଳି ତଥ୍ୟ ମିଳିଛି ବୁଥ ବାହୁଡ଼ା ମତରୁ। ବୁଧବାର ନିର୍ବାଚନ ପାଇଁ ଭୋଟ ଗ୍ରହଣ ସରିବା ପରେ ବିଭିନ୍ନ ସଂସ୍ଥା ପକ୍ଷରୁ କରାଯାଇଥିବା ବୁଥ ବାହୁଡ଼ା ମତର ଫଳାଫଳକୁ ସାର୍ବଜନୀନ କରାଯାଇଛି।
ମାଟ୍ରାଇଜ ସଂସ୍ଥା ଦ୍ଵାରା ହୋଇଥିବା ଏକଜିଟ ପୋଲ ଫଳାଫଳରୁ ଜଣାଯାଇଛି ଯେ, ମହାରାଷ୍ଟ୍ରରେ ୨୮୮ ଆସନ ମଧ୍ୟରୁ ବହୁମତ ପାଇଁ ୧୪୫ ଆସନ ଦରକାର ପଡ଼ୁଥିବାବେଳେ ବିଜେପି ନେତୃତ୍ଵାଧୀନ ମହାୟୁତି ମେଣ୍ଟକୁ ୧୫୦ରୁ ୧୭୦ ଆସନ ମିଳିବ। ସେହିପରି ପ୍ରତିଦ୍ଵନ୍ଦ୍ଵୀ କଂଗ୍ରେସ ନେତୃତ୍ଵାଧୀନ ମହା ବିକାଶ ଅଘାଡ଼ି(ଏମଭିଏ)କୁ ୧୧୦ରୁ ୧୩୦ ଆସନ ମିଳିବ। ଅନ୍ୟାନ୍ୟ ଦଳକୁ ୮ରୁ ୧୦ ଆସନ ମିଳିବ ବୋଲି ଆକଳନ କରାଯାଇଛି। ପି-ମାର୍କ ସଂସ୍ଥା ଆକଳନ ଅନୁସାରେ, ମହାୟୁତିକୁ ୧୩୭ରୁ ୧୫୭ ଏବଂ ଏମଭିଏକୁ ୧୨୬ରୁ ୧୪୬ ଆସନ ମିଳିବ। ପିପୁଲ୍ସ ପଲ୍ସ ନାମକ ସଂସ୍ଥାର ବୁଥ ବାହୁଡ଼ା ମତ କହୁଛି ମହାୟୁତିକୁ ୧୭୫ରୁ ୧୯୫ ଏବଂ ଏମବିଏକୁ ୮୫ରୁ ୧୧୨ ଆନ ମିଳିବ।
ସେହିପରି ଝାଡ଼ଖଣ୍ଡରେ ମୋଟ ୮୧ ଆସନ ମଧ୍ୟରୁ ସରକାର ଗଠନ ଲାଗି ୪୧ ଆସନ ଦରକାର। ଏଠାରେ ଜେଭିସିର ଏକଜିଟ ପୋଲ୍ ଅନୁସାରେ, ବିଜେପି ନେତୃତ୍ଵାଧୀନ ମେଣ୍ଟ ଦଳକୁ ୪୦ରୁ ୪୪ ଆସନ ଏବଂ ଜେଏମଏମ ନେତୃତ୍ଵାଧୀନ ମେଣ୍ଟକୁ ୩୦ରୁ ୪୦ ଆସନ ମିଳିବ। ସେହିପରି ମାର୍ଟାଇଜ ବୁଥ ବାହୁଡ଼ା ମତ ଅନୁସାରେ, ବିଜେପି ନେୃତ୍ଵାଧୀନ ମେଣ୍ଟ ଦଳଗୁଡ଼ିକ ୪୨ରୁ ୪୭ ଆସନ ପାଇବାକୁ ଥିବାବେଳେ ଜେଏମଏମ ନେତୃତ୍ଵାଧୀନ ମେଣ୍ଟ ୩୫ରୁ ୩୮ ଆସନ ପାଇବେ। ପିପୁଲ୍ସ ପଲ୍ସ ଅନୁସାରେ ବିଜେପି ନେତୃତ୍ଵାଧୀନ ମେଣ୍ଟ ୪୪ରୁ ୫୩ ଏବଂ କଂଗ୍ରେସ ନେତୃତ୍ଵାଧୀନ ମେଣ୍ଟ ୨୫ରୁ ୩୭ ଆସନ ଅକ୍ତିଆର କରିବ।
