ଭୁବନେଶ୍ୱର : ଶିମିଳିପାଳ ଅଭୟାରଣ୍ୟକୁ ମହାରାଷ୍ଟ୍ର ତଡ଼ବା ଅନ୍ଧାରୀ ବ୍ୟାଘ୍ର ଅଭୟାରଣ୍ୟରୁ ଏକ ବାଘୁଣୀକୁ ଅଣାଯାଇଛି। ଆଜି ସେହି ବାଘୁଣୀଟିକୁ ସିମିଳିପାଳ କୋର୍ ଅଞ୍ଚଳରେ ଛଡାଯାଇଛି । ବର୍ତ୍ତମାନ ସେ ସମ୍ପୂର୍ଣ୍ଣ ସୁସ୍ଥ ଥିବା ବନ୍ୟପ୍ରାଣୀ ପିସିସିଏଫଙ୍କ ପକ୍ଷରୁ ସୂଚନା ମିଳିଛି। ଗତ ଦଶ ବର୍ଷରେ ରାଜ୍ୟରେ ମୋଟ ୫୫ଟି ବାଘଙ୍କ ମୃତ୍ୟୁ ଘଟିଛି, ସେଥିମଧ୍ୟରୁ ୨୩ଟି ବାଘଙ୍କୁ ଶିକାରୀ ହତ୍ୟା କରିଛନ୍ତି। ରାଜ୍ୟରେ ବାଘବଂଶ ବୃଦ୍ଧି ପାଇଁ ସରକାର ବିଭିନ୍ନ ପ୍ରଦେଶରୁ ବାଘ ଆଣି ରାଜ୍ୟର ଅଭୟାରଣ୍ୟଗୁଡ଼ିକରେ ଛାଡ଼ିବା ପାଇଁ ଯୋଜନା କରିଥିବା ଜଙ୍ଗଲ, ପରିବେଶ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆ କହିଛନ୍ତି। ୨୦୨୪ରେ କରାଯାଇଥିବା ରାଜ୍ୟସ୍ତରୀୟ ବାଘ ଗଣନା ଅନୁଯାୟୀ, ଓଡ଼ିଶାରେ ସମୁଦାୟ ୨୭ଟି ରୟାଲ ବେଙ୍ଗଲ ବାଘ ଦେଖିବାକୁ ମିଳିଥିଲା। ସେଥିମଧ୍ୟରୁ ୨୪ଟି ଶିମିଳିପାଳ ଟାଇଗର ରିଜର୍ଭ, ଗୋଟିଏ କେନ୍ଦୁଝର ୱାଇଲ୍ଡ ଲାଇଫ ଡିଭିଜନ, ଗୋଟିଏ ପାରଳାଖେମୁଣ୍ଡି ଏବଂ ଗୋଟିଏ ହୀରାକୁଦ ୱାଇଲ୍ଡ ଲାଇଫ ଡିଭିଜନରେ ଦେଖିବାକୁ ମିଳିଥିଲା। ଶିମିଳିପାଳରେ ୮ଟି ବେଙ୍ଗଲ ଟାଇଗର ଛୁଆ ଦେଖାଯାଇଥିଲେ। ୨୦୧୬-୧୭ରେ ଗୋଟିଏ ବାଲାଙ୍ଗୀର ଜଙ୍ଗଲ ବିଭାଗ, ୨୦୧୭-୧୮ରେ ଗୋଟିଏ ଶିମିଳିପାଳ ଦକ୍ଷିଣ ବିଭାଗ, ୨୦୧୮-୧୯ରେ ଗୋଟିଏ ବରଗଡ଼ ଜଙ୍ଗଲ ବିଭାଗ, ୨୦୧୮-୧୯ରେ ଗୋଟିଏ ସାତକୋଶିଆ, ୨୦୨୨-୨୩ରେ ଏବଂ ୨୦୨୩-୨୪ରେ ଶିମିଳିପାଳ ଦକ୍ଷିଣ ଅଞ୍ଚଳରେ ଦୁଇଟି ବାଘଙ୍କ ମୃତ୍ୟୁ ଘଟିଥିଲା। ୨୦୦୦ ମସିହାରେ ଓଡ଼ିଶାରେ ବାଘ ଗଣନା କରାଯାଇ ନଥିଲା। ୨୦୦୨ରେ କରାଯାଇଥିବା ଗଣନା ଅନୁଯାୟୀ ପଗମାର୍କ ପ୍ରଣାଳୀ ଦ୍ୱାରା ୧୭୩ଟି ରୟାଲ ବେଙ୍ଗଲ ଟାଇଗର ଓଡ଼ିଶାରେ ଥିବା ଜଣାପଡ଼ିଥିଲା। ୨୦୦୬ରେ ପ୍ରଥମଥର ପାଇଁ କ୍ୟାମେରା ଟ୍ରାପିଂ ପଦ୍ଧତି ବ୍ୟବହାର କରି ଦେଶବ୍ୟାପୀ ବାଘ ଗଣନା କରାଯାଇଥିଲା। ଗଣନା ଅନୁଯାୟୀ ଓଡ଼ିଶାରେ ୪୫ଟି ରୟାଲ ବେଙ୍ଗଲ ବାଘ ଥିବା ଜଣାପଡ଼ିଥିଲା। ଦଶ ବର୍ଷ ମଧ୍ୟରେ ଓଡ଼ିଶା ମଧ୍ୟପ୍ରଦେଶରୁ ଦୁଇଟି ବେଙ୍ଗଲ ଟାଇଗର (୧ ପୁରୁଷ ଏବଂ ୧ ମହିଳା) ଆଣିଥିଲା। ଏହି ସମୟ ମଧ୍ୟରେ ଓଡ଼ିଶାରୁ ଅନ୍ୟ ରାଜ୍ୟକୁ କୌଣସି ବାଘ ସ୍ଥାନାନ୍ତର କରାଯାଇ ନାହିଁ ବୋଲି ମନ୍ତ୍ରୀ କହିଛନ୍ତି।
Comments are closed.