ସିଓଲ( ଦକ୍ଷିଣ କୋରିଆ): ଦକ୍ଷିଣ କୋରିଆ ସହ ମିଶି ଗୋଟିଏ ରାଷ୍ଟ୍ର ନିର୍ମାଣ ପାଇଁ ଉତ୍ତର କୋରିଆ ପକ୍ଷରୁ ନିଆରା ପ୍ରୟାସ ଆରମ୍ଭ କରାଯାଇଛି । ଉତ୍ତର କୋରିଆର ସରକାରୀ ଗଣ ମାଧ୍ୟମରେ ଏ ନେଇ ଏକ ଖବର ପ୍ରକାଶ ପାଇଛି । ୭୦ ବର୍ଷ ତଳେ ଅଲଗା ହୋଇଥିବା ଦୁଇ ଭୂଖଣ୍ଡ ଏବେ ଏକାଠି ହେବାର ସମୟ ଆସିଛି । ସମସ୍ତ କୋରିଆ ବାସିନ୍ଦା ଏଥିପାଇଁ ପ୍ରୟାସ ଆରମ୍ଭ କରିବା ଉଚିତ ବୋଲି ଉତ୍ତର କୋରିଆ ରାଜଧାନୀ ପୋୟଙ୍ଗୟାଙ୍ଗରୁ ପ୍ରକାଶିତ ହେଉଥିବା ସରକାରୀ ଖବର କାଗଜରେ ଏ ସମ୍ପର୍କରେ ଖବର ପ୍ରକାଶିତ ହୋଇଥିବା କଥା ଅନ୍ତର୍ଜାତୀୟ ଖବର ପ୍ରସାରଣ ସଂସ୍ଥା ରଏଟର ସହ ବ୍ରିଟେନର ଅନେକ ଖବର ପ୍ରସାରଣ ସଂସ୍ଥା ଏହି ଖବର ପ୍ରକାଶତି କରିଛନ୍ତି ।
ଦୁଇ ଦେଶର ମିଶ୍ରଣ ପାଇଁ ଥିବା ସମସ୍ତ ପ୍ରତିବନ୍ଧକକୁ ହଟାଇ ଦିଅ ବୋଲି ଏଥିରେ ପ୍ରକାଶିତ କରାଯାଇଛି । ଅନ୍ୟ କୌଣସି ବିଦେଶୀ ଶକ୍ତିର ସାହାଯ୍ୟ ବିନା ଏହା କରାଯାଉ ବୋଲି ଉତ୍ତର କୋରିଆର ସରକାରୀ ଗଣ ମାଧ୍ୟମରେ ଏହି ଖବର ପ୍ରକାଶିତ ହୋଇଛି ।
କିଛି ଦିନ ତଳେ ଉତ୍ତର ଓ ଦକ୍ଷିଣ କୋରିଆ ଗୋଟିଏ ପତାକା ତଳେ ଫେବୃଆରୀରେ ଅନୁଷ୍ଠିତ ହେବାକୁ ଥିବା ଶୀତକାଳୀନ ଅଲମ୍ପିକରେ ଅଂଶ ଗ୍ରହଣ କରିବା ପାଇଁ ନିଷ୍ପତ୍ତି ନେବା ପରେ ଏହି ଖବର ପ୍ରକାଶିତ ହୋଇଛି । ଏହି ଖବରରେ ଦେଶରେ ଓ ବିଦେଶରେ ଥିବା ସମସ୍ତ କୋରିଆର ନାଗରିକ ଏଥିପାଇଁ ଚେଷ୍ଟା କରିବା ଦରକାର ବୋଲି କହିଛନ୍ତି । ଦକ୍ଷଣ କୋରିଆରେ କରାଯାଉଥିବା ସେନା ଓ ଅସ୍ତ୍ରଶସ୍ତ୍ର ବିକାଶ କେବଳ ବିଦେଶୀ ଶକ୍ତିଙ୍କୁ ସାହାଯ୍ୟ କରିବ , ଅଲଗା ହୋଇଥିବା ଦୁଇ ଦେଶ ଏକାଠି ହୋଇ ଏହି ଅଞ୍ଚଳର ବିକାଶ କରିବା ଆବଶ୍ୟକ ବୋଲି ଏଥିରେ ଉଲ୍ଲେଖ ରହିଛି । ଉତ୍ତର କୋରିଆ ସରକାର ଓ ରାଜନୈତିକ ଦଳମାନଙ୍କର ଏକ ବୈଠକ ପରେ ଏହି ନିଷ୍ପତ୍ତି ନିଆଯାଇଥିବା ସୂଚନା ମିଳିଛି । କୋରିଆ ଉପମହାଦ୍ୱୀପରେ ଉତ୍ତେଜନା କମ କରିବା ସହ ଶାନ୍ତି ପ୍ରତିଷ୍ଠା ପାଇଁ ଏହି ପଦକ୍ଷେପ ଗ୍ରହଣ କରିବାର ଆବଶ୍ୟକତା ଅଛି ବୋଲି ଏଥିରେ ପ୍ରକାଶିତ ହୋଇଛି ।
