ସମାଜ ଡିଜିଟାଲ ଡେସ୍କ: କଲକାତା ଦୁଷ୍କର୍ମ ଓ ହତ୍ୟା ମାମଲାରେ ଆର ଜି କର ମେଡିକାଲ କଲେଜର ପୂର୍ବତନ ଅଧ୍ୟକ୍ଷ ସନ୍ଦୀପ ଘୋଷ ଏବଂ ଅନ୍ୟ ୪ ଡାକ୍ତରଙ୍କର ପଲିଗ୍ରାଫ ପରୀକ୍ଷା କରାଯିବ। ଏଥିପାଇଁ ସିଟି କୋର୍ଟ ମାମଲାର ତଦନ୍ତ କରୁଥିବା କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ)କୁ ଅନୁମତି ପ୍ରଦାନ କରିଛନ୍ତି।
୫ ଅଭିଯୁକ୍ତଙ୍କର ପଲିଗ୍ରାଫ ପରୀକ୍ଷା କରିବା ଲାଗି ସିବିଆଇ ପକ୍ଷରୁ କୋର୍ଟରେ ଆବେଦନ କରାଯାଇଥିଲା। କାରଣ ପୂର୍ବତନ ଅଧ୍ୟକ୍ଷ ଏବଂ ଅନ୍ୟ ୪ ଡାକ୍ତରଙ୍କୁ ଜେରା ବେଳେ ସେ ଯେଉଁ ମନ୍ତବ୍ୟ ଦେଉଛନ୍ତି ସେଥିରେ ତାଳମେଳ ରହୁନାହିଁ। ୮ ଏବଂ ଅଗଷ୍ଟ ମଧ୍ୟ ରାତ୍ରିରେ ଯାହା ସବୁ ଘଟିଥିଲା ସେ ବିଷୟରେ ସିବିଆଇ ପକ୍ଷରୁ ଅଭିଯୁକ୍ତମାନଙ୍କୁ ଜେରା କରାଯାଇଥିଲା। କିନ୍ତୁ କାହାର ମନ୍ତବ୍ୟ କାହା ସହିତ ମିଶୁ ନାହିଁ। ଘଟଣା ଦିନ ରାତିରେ ପୂର୍ବତନ ଅଧ୍ୟକ୍ଷ ଘୋଷଙ୍କ ସହିତ ଉକ୍ତ ୪ ଡାକ୍ତର ଡ୍ୟୁଟିରେ ଥିଲେ। ଏହା ସହିତ ପୀଡ଼ିତା ଉକ୍ତ ରାତିରେ ଏହି ୫ ଜଣଙ୍କ ସହିତ ମିଶି ସାନ୍ଧ୍ୟ ଭୋଜନ କରିଥିଲେ। ତେଣୁ ସେମାନଙ୍କ ମନ୍ତବ୍ୟରେ ସତ୍ୟତା ରହିଛି କି ନାହିଁ ତାହା ଯାଞ୍ଚ କରିବାକୁ ସିବିଆଇ ସେମାନଙ୍କର ପଲିଗ୍ରାଫ ପରୀକ୍ଷା କରିବାକୁ କୋର୍ଟରେ ଆବେଦନ କରିଥିଲା।
