ବାସୁଦେବପୁର : ବାସୁଦେବପୁର ପୌରପାଳିକା ଅଧିନ ରାଧାକାନ୍ତପୁର ଗ୍ରାମର ଦିବାକର ମିଶ୍ର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ମଧ୍ୟାହ୍ନ ଭୋଜନରୁ ଜୋକ ବାହାରିବା ଘଟଣାରେ ଶୁକ୍ରବାର ବିଦ୍ୟାଳୟର ଛାତ୍ରଛାତ୍ରୀମାନେ ମଧ୍ୟାହ୍ନ ଭୋଜନ ବର୍ଜନ କରିଛନ୍ତି। ଏଥିସହ ମଧ୍ୟାହ୍ନ ଭୋଜନ ଆଣିଥିବା ଗାଡ଼ିକୁ ଅଭିଭାବକମାନେ ଅଟକ ରଖିଛନ୍ତି। ମଧ୍ୟାହ୍ନ ଭୋଜନ ଗାଡ଼ି ଅଟକ ରହିବା କାରଣରୁ ଆଦର୍ଶ ବିଦ୍ୟାଳୟ ଇରମ ସମେତ ଚାରିଗୋଟି ବିଦ୍ୟାଳୟର ଛାତ୍ରଛାତ୍ରୀମାନେ ମଧ୍ୟାହ୍ନ ଭୋଜନରୁ ବଞ୍ଚିତ ହୋଇଛନ୍ତି। ଲଗାତର ତିନିବର୍ଷ ଧରି ସମାନ ଅଭିଯୋଗ ଆସିଥିବାବେଳେ ଶିକ୍ଷା ବିଭାଗ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନକରିବା କାରଣରୁ ଶିକ୍ଷା ବିଭାଗର ଆଲୋଚନା ବିଫଳ ହୋଇଛି। ଖବରପାଇ ବିଦ୍ୟାଳୟରେ ପହହଞ୍ଚିଥିଲେ ଅତିରିକ୍ତ ବ୍ଲକ ଶିକ୍ଷାଧିକାରୀ(ଏବିଇଓ) ଅମିୟ ମହାଳିକ। ଅଭିଭାବକମାନେ ଅତିରିକ୍ତ ବ୍ଲକ ଶିକ୍ଷାଧିକାରୀଙ୍କୁ ଘେରିଯାଇଥିଲେ। ପରେ ପ୍ରଧାନଶିକ୍ଷକ ବିଷ୍ଣୁ ମୋହନ ବେହେରାଙ୍କ ଉପସ୍ଥିତିରେ ଆଲୋଚନା କରାଯାଇଥିଲା। ଏହି ଆଲୋଚନାରେ ବିଦ୍ୟାଳୟ ପରିଚାଳନା କମିଟି, କାଉନସିଲର ଓ ଗ୍ରାମବାସୀମାନେ ଉପସ୍ଥିତ ଥିଲେ।
ସୂଚନାଯୋଗ୍ୟ, ବାସୁଦେବପୁର ପୌରପାଳିକା ଅଧିନ ରାଧାକାନ୍ତପୁର ଗ୍ରାମର ଦିବାକର ମିଶ୍ର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ଗୁରୁବାର ଚତୁର୍ଥ ଶ୍ରେଣୀ ଛାତ୍ରୀ ସ୍ବାଗତିକା ମଳିକ ଥାଳିରୁ ଜୋକ ବାହାରିଥିଲା।
