ମୁମ୍ବଇ : ରଜନୀକାନ୍ତଙ୍କ ଅଭିନୀତ ତାମିଲ ଚଳଚ୍ଚିତ୍ର ‘ପେଟ୍ଟା’ର ଟ୍ରେଲର ରିଲିଜ ହୋଇଛି। ଏଥିରେ ରଜନୀକାନ୍ତଙ୍କୁ ୯୦ଦଶକର ବେଶଭୂଷାରେ ଦେଖିବାକୁ ମିଳିଛି। ଚଳଚ୍ଚିତ୍ରରେ ରଜନୀକାନ୍ତଙ୍କ ବ୍ୟତୀତ ନବାଜୁଦ୍ଦିନ ସିଦ୍ଦିକି, ତୃଷା, ବବି ସିମ୍ହା, ବିଜୟ ସେଥୁପଥୀ, ସିମରନ୍ ବଗ୍ଗାଙ୍କୁ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକାରେ ଦେଖିବାକୁ ମିଳିଛି। ‘ପେଟ୍ଟା’ ଆସନ୍ତା ଜାନୁଆରୀ ୧୦ତାରିଖରେ ମୁକ୍ତିଲାଭ କରିବ।
ଏହା ରଜନୀକାନ୍ତଙ୍କ ୧୬୫ତମ ଚଳଚ୍ଚିତ୍ର। ନବାଜୁଦ୍ଦିନ ଚଳଚ୍ଚିତ୍ରର ଜଣେ ଅଭିନେତା ହୋଇଥିବାରୁ ବହୁତ ଖୁସି ଥିବା ଜଣାପଡ଼ିଛି। ଟ୍ରେଲରର ଅଧିକାଂଶ ଭାଗରେ କେବଳ ରଜନୀକାନ୍ତଙ୍କୁ ହିଁ ଦେଖିବାକୁ ମିଳିଛି। ନବାଜୁଦ୍ଦିନଙ୍କ ସ୍ୱଳ୍ପ ଝଲକ୍ ମଧ୍ୟ ଦେଖିବାକୁ ମିଳିଛି। ହେଲେ ଏହି ଝଲକରେ ସେ ତାଙ୍କ ଭୂମିକାକୁ ଖୁବ୍ ଭଲ ଭାବେ ଚିତ୍ରଣ କରିଛନ୍ତି। ଦର୍ଶକମାନଙ୍କୁ ‘ପେଟ୍ଟା’ ୧୯୮୦-୯୦ ମସିହାର ସମୟକୁ ମନେ ପକାଇଦେବ ବୋଲି କୁହାଯାଉଛି।
