ବାଲେଶ୍ବର : ବାଲେଶ୍ଵର ମେଡିକାଲରୁ ଚୋରି ହୋଇଥିବା ନବଜାତ ଶିଶୁ ଉଦ୍ଧାର ହୋଇଛି। ଜଳେଶ୍ଵର ଅଞ୍ଚଳରୁ ପୁଲିସ ନବଜାତ ପୁତ୍ରକୁ ଉଦ୍ଧାର କରିଛି। ତେବେ ଶିଶୁଟିକୁ ଚୋରି କରିଥିବା ମହିଳାଙ୍କ ସମେତ ଆଶାକର୍ମୀଙ୍କୁ ପୁଲିସ ଅଟକ ରଖିଛି। ଶିଶୁଟିକୁ ଉଦ୍ଧାର କରାଯିବା ପରେ ବାଲେଶ୍ଵର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିବା ସୂଚନା ମିଳିଛି। ରବିବାର ବାଲେଶ୍ବର ଜିଲା ମୁଖ୍ୟ ଚିକିତ୍ସାଳୟର ସ୍ତ୍ରୀ ରୋଗ ଓ ପ୍ରସୂତି ବିଭାଗରୁ ନବଜାତ ଶିଶୁ ଚୋରି ହୋଇଥିବା ଥାନାରେ ଅଭିଯୋଗ ହୋଇଥିଲା। ଶନିବାର ରାତି ପ୍ରାୟ ୧୨ଟାରେ ଜିଲା ମୁଖ୍ୟ ଚିକିତ୍ସାଳୟ ପ୍ରସୂତି ୱାର୍ଡ଼ରେ ଭର୍ତ୍ତି ହୋଇଥିବା ବାଲିଆପାଳ ଥାନା କୁଲାଚଡ଼ ଗାଁର ପୂର୍ଣ୍ଣଚନ୍ଦ୍ର ଦଣ୍ଡପାଟଙ୍କ ପତ୍ନୀ ଅନୀତାଙ୍କର ଏକ ପୁତ୍ର ସନ୍ତାନ ଜନ୍ମ ହୋଇଥିଲା। ମା ଓ ଶିଶୁ ଡାକ୍ତରଖାନା ୱାର୍ଡରେ ଥିବାବେଳେ ରବିବାର ଜଣେ ଅଚିହ୍ନା ମହିଳା ସେଠାରେ ପହଞ୍ଚି ଅନୀତା ଓ ତାଙ୍କ ଶାଶୁଙ୍କ ସହ ଗପସପ କରୁ କରୁ ନବଜାତ ଶିଶୁକୁ ଧରାଧରି କରିଥିଲେ। ଏମିତିକି ଆଶା କର୍ମୀ ସନ୍ଧ୍ୟାରାଣିଙ୍କ ସହ ମଧ୍ୟ ଶିଶୁର ସ୍ବାସ୍ଥ୍ୟ ଅବସ୍ଥା ଓ ଯତ୍ନ ବାବଦ ସେ ଆଲୋଚନା କରୁଥିଲେ। ସେ ବାରମ୍ବାର ଅନୀତାଙ୍କ ଶଯ୍ୟା ପାଖକୁ ଆସି ସେମାନଙ୍କର ସମସ୍ୟା ବାବଦ ପଚାରି ବୁଝୁଥିଲେ। ରବିବାର ଆଶାକର୍ମୀ ସନ୍ଧ୍ୟାରାଣୀ ଏବଂ ଅନୀତାଙ୍କ ଶାଶୁ ୱାର୍ଡ଼ରେ ନ ଥିବାର ସୁଯୋଗ ଦେଖି ଅଚିହ୍ନା ମହିଳା ଜଣକ ଡାକ୍ତରଙ୍କୁ ଦେବା କଥା କହି ଶିଶୁପୁତ୍ରକୁ ନେଇ ଯାଇଥିଲେ। ମାତ୍ର ଦୀର୍ଘ ସମୟ ପର୍ଯ୍ୟନ୍ତ ସେ ନ ଫେରିବା ଦେଖି ଅନୀତାଙ୍କ ପରିବାର ଲୋକେ ଖୋଜାଖୋଜି ପରେ ହସପିଟାଲ ଫାଣ୍ଡିରେ ଅଭିଯୋଗ କରିଥିଲେ। ଖବର ପାଇ ଟାଉନ ଥାନା ପୁଲିସ ଡାକ୍ତରଖାନାରେ ପହଞ୍ଚି ସିସିଟିଭି କ୍ୟାମେରା ଯାଞ୍ଚ କରିବା ସହ ଅଚିହ୍ନା ମହିଳାର ଗତିବିଧି ସମ୍ପର୍କିତ ଭିଡିଓ ଜବତ କରିଛି। ଅନ୍ୟପକ୍ଷରେ ଅନୀତାଙ୍କ ସହ ଆସିଥିବା ଆଶା କର୍ମୀ ଓ ହସପିଟାଲର ସୁରକ୍ଷା କର୍ମୀଙ୍କୁ ଅଟକ ରଖି ପୁଲିସ ପଚରାଉଚରା କରିଥିଲା। ଆଜି ଜଳେଶ୍ଵର ଅଞ୍ଚଳରୁ ପୁଲିସ ନବଜାତ ପୁତ୍ରକୁ ଉଦ୍ଧାର କରିଛି।
Popular Categories
Previous article
Next article