ଡେସ୍କ: ଅରୁଣାଚଳ ପ୍ରଦେଶ ଓ ସିକ୍କିମ ବିଧାନସଭା ନିର୍ବାଚନ ପାଇଁ ଭୋଟ ଗଣତି ସୁରୁଖୁରୁରେ ଚାଲିଛି। ଫଳାଫଳ ଆସିବା ଆରମ୍ଭ ହୋଇଛି। ଅରୁଣାଚଳ ପ୍ରଦେଶରେ ବିଜେପି ବିପୁଳ ବିଜୟ ଆଡ଼କୁ ଗତି କରୁଛି। ସିକ୍କିମରେ ଶାସକ ସିକ୍କିମ କ୍ରାନ୍ତିକାରୀ ମୋର୍ଚ୍ଚା ବିଜୟ ଆଡ଼କୁ ଗତି କରୁଛି।
ଅରୁଣାଚଳର ୧୫ଟି ଆସନର ଫଳାଫଳ ମିଳିଛି। ୧୩ଟି ଆସନ ବିଜେପି ସପକ୍ଷରେ ଯାଇଛି। ଚାଙ୍ଗଲାଙ୍ଗ ଦକ୍ଷିଣ ଆସନରେ ହେମଜୋଙ୍ଗ ଟାଙ୍ଗା ନ୍ୟାସନାଲ ପିପୁଲ୍ସ ପାର୍ଟିର ଟିମପୁନ ନଗେମୁଙ୍କୁ ପରାସ୍ତ କରିଛନ୍ତି। ବୋର୍ଡୁରିଆ ବୋଗାପାଣି ଆସନରେ ୱାଙ୍ଗଲିନ ଲଙ୍ଗଡୋଙ୍ଗ ଏନସିପି ପ୍ରାର୍ଥୀ ଜୋୱାଙ୍ଗ ହୋସାଇଙ୍କୁ ପରାସ୍ତ କରିଛନ୍ତି। ଗୋଟିଏ ଆସନ ନ୍ୟାସନାଲ ପିପୁଲ୍ସ ପାର୍ଟିକୁ ଯାଇଥିବା ବେଳେ ଗୋଟିଏ ଆସନରେ ସ୍ୱାଧୀନ ପ୍ରାର୍ଥୀ ବିଜୟୀ ହୋଇଛନ୍ତି। ୬୦ ଆସନ ବିଶିଷ୍ଟ ବିଧାନସଭାରେ ବିନା ପ୍ରତିଦ୍ୱନ୍ଦ୍ୱିତାରେ ବିଜେପି ୧୦ଟି ଆସନରେ ବିଜୟୀ ହୋଇଥିଲା।
୫୦ରୁ ୩୩ଟି ଆସନ ପାଇଁ ଟ୍ରେଣ୍ଡ ମିଳିଛି। ବିଜେପି ୨୩ଟି ଆସନରେ ଆଗୁଆ ରହିଛି। ନ୍ୟାସନାଲ ପିପୁଲ୍ସ ପାର୍ଟି ୪ଟି ଆସନରେ ଆଗୁଆ ରହିଛି। ପିପୁଲ୍ସ ପାର୍ଟି ଅଫ୍ ଅରୁଣାଚଳ ୨ଟି ଆସନରେ ଆଗୁଆ ରହିଛି। ରାଷ୍ଟ୍ରବାଦୀ କଂଗ୍ରେସ ପାର୍ଟି – ଏନସିପି ୩ଟି ଓ ସ୍ୱାଧୀନ ପ୍ରାର୍ଥୀ ଗୋଟିଏ ଆସନରେ ଆଗୁଆ ରହିଛନ୍ତି।
ସିକ୍କିମରେ ୧୧ଟି ଆସନର ଫଳାଫଳ ମିଳିଛି, ଯାହା ସିକ୍କିମ କ୍ରାନ୍ତିକାରୀ ମୋର୍ଚ୍ଚା ସପକ୍ଷରେ ଯାଇଛି। ରାଜ୍ୟରେ ୩୨ଟି ଆସନ ପାଇଁ ମତଦାନ ହୋଇଥିଲା। ଏ ପର୍ଯ୍ୟନ୍ତ ସିକ୍କିମ କ୍ରାନ୍ତିକାରୀ ମୋର୍ଚ୍ଚା ୨୦ଟି ଆସନରେ ଆଗୁଆ ରହିଥିବା ବେଳେ ସିକ୍କିମ ଡେମୋକ୍ରାଟିକ୍ ଫ୍ରଣ୍ଟ ଗୋଟିଏ ଆସନରେ ଆଗୁଆ ରହିଛି। ଏହି ବିଧାନସଭାଗୁଡ଼ିକର କାର୍ଯ୍ୟକାଳ ଆଜି ଶେଷ ହେଉଛି। ଉତ୍ତର-ପୂର୍ବର ଦୁଇ ରାଜ୍ୟରେ ବିଧାନସଭା ଓ ଲୋକସଭା ନିର୍ବାଚନ ଏପ୍ରିଲ ୧୯ ତାରିଖରେ ଅନୁଷ୍ଠିତ ହୋଇଥିଲା।
