ବାସୁଦେବପୁର : କଷିଆ ସାମୁଦ୍ରିକ ଥାନା ଅଧିନ ଚାନ୍ଦିମାଳ କେକେଜିପି ହାଇସ୍କୁଲରୁ ଚୋରି ହୋଇଥିବା କମ୍ପ୍ୟୁଟର ସାମଗ୍ରୀ ଜବତ କରିବା ସହିତ ଦୁଇଜଣଙ୍କୁ ଗିରଫ କରିଛି ପୁଲିସ । ଚଳିତ ମାସ ୧୨ ତାରିଖ ରାତିରେ ବିଦ୍ୟାଳୟରୁ କମ୍ପ୍ୟୁଟର ସାମଗ୍ରୀ ଚୋରି ହୋଇଥିବା ନେଇ ପ୍ରଧାନଶିକ୍ଷକ ବସନ୍ତ ପ୍ରଧାନ ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗକୁ ଆଧାର କରି କଷିଆ ସାମୁଦ୍ରିକ ଥାନା ପୁଲିସ ଥାନା କେସ୍ ନମ୍ବର ୬୨/୨୪ରେ ମାମଲା ରୁଜୁ କରିଥିଲା । ଘଟଣାକ୍ରମରେ ଚୋରି ଘଟଣାରେ ସଂପୃକ୍ତ କୃଷ୍ଣପୁର ଗ୍ରାମର ଅରୁପ କୁମାର ବେହେରା(୩୧) ଓ ଭୁଜେନ୍ଦ୍ର ନାୟକ(୨୪)ଙ୍କୁ ଗିରଫ କରାଯାଇଛି । ଚୋରି ହୋଇଥିବା ୪୨ଗୋଟି ମନିଟର, ୧୧ଗୋଟି କିବୋର୍ଡ, ୧୨ଗୋଟି ହେଡଫୋନ, ଭିକ୍ଲାଉଡ ୧୨ଗୋଟି, ଲେନୋଭୋ ସିପିୟୁ ୧ଟା ସହିତ ଚୋରି ଘଟଣାରେ ବ୍ୟବହୃତ କଟର, ବ୍ୟାଟେରୀ ଓ ମହିନ୍ଦ୍ରା ପିକଅପକୁ ଜବତ କରାଯାଇଥିବା ଥାନା ପରିସରରେ ଆୟୋଜିତ ଖବରଦାତା ସମ୍ମିଳନୀରେ ଏସଡିପିଓ ସୌରଭ ଓତା ସୂଚନା ଦେଇଛନ୍ତି । ଏହି ସମୟରେ ଥାନାଧିକାରୀ ସାବିତ୍ରୀ ପଣ୍ଡାଙ୍କ ସମେତ ଅନ୍ୟ ପୁଲିସ କର୍ମଚାରୀମାନେ ଉପସ୍ଥିତ ଥିଲେ । ଏହି ଘଟଣାରେ ସଂପୃକ୍ତ ଅନ୍ୟମାନଙ୍କୁ ଖୁବଶୀଘ୍ର ଗିରଫ କରାଯିବ ବୋଲି ଥାନାଧିକାରୀ ସୂଚନା ଦେଇଛନ୍ତି ।
Popular Categories
Previous article
Next article