ନୂଆଦିଲ୍ଲୀ : କର୍ମଚାରୀ ଭବିଷ୍ୟ ନିଧି ସଙ୍ଗଠନ ପିଏଫ୍ ପଇସା ଉଠାଣର ପ୍ରକ୍ରିୟାକୁ ଅଧିକ ସହଜ କରିଦେଇଛି । ଇପିଏଫଓ ଅଟୋ ମୋଡ୍ ସେଟଲମେଣ୍ଟ ଆରମ୍ଭ କରିଛି । ଏଥିରେ ୬ କୋଟିରୁ ଅଧିକ ପିଏଫ୍ ସଦସ୍ୟଙ୍କୁ ଲାଭ ମିଳିବ । ଏହା ଏମିତି ଏକ ସୁବିଧା ଯାହା ଜରୁରି ସମୟରେ ପିଏଫ୍ ସଦସ୍ୟଙ୍କୁ ପୁଞ୍ଜି ଯୋଗାଇଥାଏ । ତଦନୁସାରେ ଏବେ ୩ ଦିନରେ ହିଁ ପଇସା ଆପଣଙ୍କ ବ୍ୟାଙ୍କ ଆକାଉଣ୍ଟକୁ ପଠାଇ ଦିଆଯିବ ।
ଅଟୋ-ମୋଡ ସେଟଲମେଣ୍ଟ ଅନୁସାରେ ଜରୁରି ପରିସ୍ଥିତିରେ କର୍ମଚାରୀ ନିଜ ଇପିଏଫରୁ ଅଗ୍ରୀମ ଟଙ୍କା ଉଠାଇ ପାରିବେ । ଇପିଏଫଓ ଜରୁରି ଚିକିତ୍ସା ସୁବିଧା, ଶିକ୍ଷା, ବିବାହ ଏବଂ ଘର କିଣିବା ପାଇଁ ପଇସା ଉଠାଣର ସୁବିଧା ଦେଇଥାଏ । ଏଥିରୁ କୌଣସି ଏକ ଏମରଜେନ୍ସି ସମୟରେ ଆପଣ ପିଏଫ୍ ଆକାଉଣ୍ଟରୁ ଅଗ୍ରୀମ ଟଙ୍କା ଉଠାଇ ପାରିବେ । ଏମରଜେନ୍ସିରେ ଏହି ଫଣ୍ଡର କ୍ଲେମ୍ ସେଟଲମେଣ୍ଟ ପାଇଁ ଅଟୋ ମୋଡ ୨୦୨୦ରୁ ଆରମ୍ଭ ହୋଇଥିଲା କିନ୍ତୁ ସେବେ କେବଳ ମେଡିକାଲ ମାମଲାରେ ଜରୁରକାଳୀନ ଭିତ୍ତିରେ ପଇସା ଉଠାଇ ହେଉଥିଲା । ଏବେ ଏହାର ପରିସର ବଢାଇ ଦିଆଯାଇଛି । ଏଣିକି ଆପଣ ଶିକ୍ଷା, ବିବାହ, ଏବଂ ଘର କିଣିବା ପାଇଁ ମଧ୍ୟ ଇପିଏଫରୁ ପଇସା ଉଠାଇ ପାରିବେ ।
ଅଗ୍ରୀମ ରାଶି ଉଠାଇବାର ପ୍ରକ୍ରିୟା
ସର୍ବ ପ୍ରଥମେ ଆପଣଙ୍କୁ ଇପିଏଫଓ ପୋର୍ଟଲରେ ଲଗ ଇନ୍ କରିବାକୁ ହେବ । ଏଥିପାଇଁ ୟୁଏଏନ୍ ଏବଂ ପାସଓ୍ବର୍ଡ ଜରୁରି । ଲଗ୍ ଇନ୍ କରିବା ପରେ ଆପଣଙ୍କୁ ଅନଲାଇନ ସେବାକୁ ଯିବାକୁ ହେବ ଏବଂ ପରେ କ୍ଲେମ୍ ବିଭାଗ ଚୟନ କରିବାକୁ ହେବ । ପରେ ଆପଣଙ୍କୁ ବ୍ୟାଙ୍କ ଆକାଉଣ୍ଟକୁ ଭେରିଫାଏ କରିବାକୁ ହେବ । ଏହି ବ୍ୟାଙ୍କ ଆକାଉଣ୍ଟରେ ଅଗ୍ରୀମ ପଇସା ଆସିବ । ଏହା ପରେ ଆପଣଙ୍କୁ ନିଜ ବ୍ୟାଙ୍କ ଆକାଉଣ୍ଟର ଚେକର ଏକ କପି ବା ପାସବୁକ୍ ଅପଲୋଡ୍ କରିବାକୁ ହେବ । ପରେ ସେହି କାରଣ ସମ୍ପର୍କରେ ଦର୍ଶାଇବାକୁ ହେବ ଯେଉଁଥିପାଇଁ ଆପଣ ପଇସା ଉଠାଇବାକୁ ଚାହୁଁଛନ୍ତି । ଏହା ପରେ ଆଗାମୀ କିଛି ପ୍ରକ୍ରିୟା ଅନୁସରଣ କରି ଆପଣ ଆବେଦନ କରିବେ । ୩-୪ ଦିନ ଭିତରେ ପଇସା ଆପଣଙ୍କ ଆକାଉଣ୍ଟକୁ ଆସିଯିବ ।
Comments are closed.